Toshkent hayvonot bog‘ida ayol kichkina qizaloqni ayiq volyeriga tashlab yuborganligi holati yuzasidan jinoyat ishi qo‘zg‘atildi. Bu haqda Bosh prokuratura axborot xizmati “Daryo” so‘roviga asosan ma’lumot berdi.
Qayd etilishicha, 28-yanvar kuni soat 14:30 larda fuqaro Z.T. Toshkent hayvonot bog‘idagi ayiq qafasi oldiga 2018-yilda tug‘ilgan Z.A. bilan birgalikda kelib, uni qasddan o‘ldirish maqsadida qafasning tomoshabinlar uchun mo‘ljallangan joydan, yuqori balandlikda Z.A.ni bir necha daqiqa ushlab turib, qafasga tashlab yuborgan.
Natijada Z.A. olgan hayot uchun xavfli bo‘lgan og‘ir tan jarohatlari bilan Respublika shoshilinch tibbiy yordam ilmiy markaziga yotqizilgan va ko‘rsatilgan shoshilinch tibbiy yordam natijasida hayoti saqlab qolingan.
Mazkur holat yuzasidan RSHTYoIM tomonidan 28-yanvar kuni taqdim qilingan tibbiy ma’lumotnomaga ko‘ra, voyaga yetmagan Z.A.da bosh miya yopiq jarohati, bosh miya jarohati, bosh asosi sinishi, yumshoq to‘qimalari lat yeyishi kabi tan jarohatlari mavjudligi aniqlangan.
Shuningdek, Z.T.ning yuqoridagi harakatlarida og‘irlashtiruvchi holatlarda, aybdorga ayon bo‘lgan ojiz ahvoldagi shaxsni qasddan o‘ldirishga suiqasd qilishda ifodalangan va Jinoyat kodeksining 25-(jinoyatga tayyorgarlik ko‘rish va jinoyat sodir etishga suiqasd qilish), 97-moddasi 2-qismi “v” bandi (qasddan odam o‘ldirish aybdorga ayon bo‘lgan ojiz ahvoldagi shaxsni) bilan Yunusobod tuman prokuraturasi tomonidan jinoyat ishi qo‘zg‘atilib, hozirda tergov harakatlari o‘tkazilmoqda.
Avvalroq Toshkent hayvonot bog‘ida ayol yosh qizaloqni ayiq qafasiga tashlab yuborgani, Zuzu laqabli ayiq zovurga tushib, qizaloqni hidlab ko‘rib, undan uzoqlashganligi haqida xabar berilgan edi.
