Meta Platforms асосчиси Марк Цукерберг Forbes журнали талқини бўйича дунёнинг энг бой одамлари ўнлигида эгаллаб турган ўрнини йўқотди. Forbes маълумотларига кўра, миллиардернинг бойлиги бир кунда 25,93 фоизга ёки 29,7 миллиард долларга камайганидан кейин у 12-ўринга тушиб кетган. 4 февраль ҳолатига Цукербергнинг бойлиги 84,8 миллиард долларни ташкил қилмоқда.
Forbes маълумотларига кўра, Цукерберг 2015 йилнинг ёзидан бери биринчи марта миллиардерларнинг Топ-10 талигидан жой эгалламади. Меtа раҳбари бир кунда кўрган йўқотишлари миқдори бўйича Илон Маскдан кейин иккинчи ўринда турибди. Дунёнинг энг бой одами Маск 2022 йилнинг ноябрь ойида Twitter’да фойдаланувчилардан солиқ тўлаш учун Tesla акцияларининг 10 фоизини сотиши керакми ёки йўқлиги ҳақида сўров ўтказгач, бир кунда 35 миллиард доллар йўқотганди.
Bloomberg Billionaires Index маълумотларида Meta Platforms раҳбари ҳозирда дунёдаги энг бой ўнинчи одами экани айтилмоқда. Bloomberg экспертлари унинг бир суткада йўқотган бойлигини 31 миллиард долларга, ҳозир тасарруфидаги бойлигини 89,6 миллиард долларга баҳоламоқда. Forbes рўйхатининг ўнинчи қаторидан эса Adani Group раҳбари Гаутам Адани, 90,1 миллиард доллар билан жой олиб турибди.
Марк Цукерберг Meta Platforms’нинг деярли 13 фоизига эгалик қилади. Компания тарихий кўламдаги инқирозга дуч келди: 3 февралдаги савдолар чоғида унинг котировкалари 26,39 фоизни йўқотди ва ҳар бир акция нархи 237,76 долларгача тушиб кетди. New York Post хабарига кўра, бозор капиталлашуви 232 миллиард долларга камайган.
Изоҳ (0)