Yangi Zelandiya bosh vaziri Jasinda Ardern Avstraliyadagi emlangan yangi zelandiyaliklar 27-fevraldan vataniga qaytishi mumkinligini, boshqa mamlakatlarning emlangan fuqarolariga esa 13-martdan Yangi Zelandiyaga kirishga ruxsat berilishini ma’lum qildi, deb xabar beradi BBC News.
Mamlakatga kelayotgan barcha fuqarolar mustaqil ravishda o‘zini 10 kunga yakkalashi kerak bo‘ladi, biroq ularni davlat karantin muassasalarida joylashtirish majburiyati bekor qilinadi.
12-apreldan boshlab mamlakatga 5 minggacha xorijlik talabalar kirishi mumkin. Yangi Zelandiyaga vizasiz tashrif buyura oladigan avstraliyaliklar va boshqa davlat fuqarolari mamlakatga uzog‘i bilan iyuldan boshlab kirishi kutilmoqda. Oktabrdan boshlab esa odatda viza talab etiladigan boshqa toifadagi xorijlik va talabalarning Yangi Zelandiyaga kirishiga ruxsat beriladi.
Yangi Zelandiya chegaralari pandemiya sabab qariyb ikki yildan buyon yopiq. Mamlakatda pandemiya boshlanganidan buyon salkam 17 ming kishida koronavirus aniqlangan va 53 kishi vafot etgan.
Avvalroq Yangi Zelandiyada majburiy emlash va lokdaunga qarshi norozilik namoyishlari bo‘lib o‘tgani haqida xabar berilgandi.
Izoh (0)