Tojikistonning Rossiyadagi elchixonasi 29-yanvar kuni Moskvada travmatik qurol qo‘llangan holda sodir etilgan ommaviy mushtlashuvdan so‘ng, tojikistonliklarning hibsga olinishiga oid holatni o‘rgandi, deb xabar beradi Asia-Plus.
“Moskvadagi ommaviy mushtlashuvda ishtirok etganlikda gumonlanib qo‘lga olingan 65 nafar shaxsning 15 nafari Tojikiston fuqarosidir. Ularning yetti nafariga nisbatan ma’muriy ish qo‘zg‘atilgan va katta ehtimol bilan ular Rossiyadan deport qilinadi. Yana bir fuqaroga nisbatan Jinoyat kodeksining 213-moddasi (bezorilik) bo‘yicha jinoyat ishi ochilgan”, — deyiladi elchixona xabarida. Biroq elchixona politsiya tomonidan qo‘lga olingan boshqa Tojikiston fuqarolarining taqdiri haqida ma’lumot bermagan.
Elchixona ma’lumotlariga ko‘ra, ommaviy mushtlashuv 29-yanvar kuni soat 19:00 da Moskvadagi Vostrayakovskoe ko‘chasida sodir bo‘lgan.
“Aniqlanishicha, mojaro shaxsiy adovat tufayli yuzaga kelgan va ommaviy mushtlashuvga aylanib ketgan. Natijada voqea joyiga Rossiya huquq-tartibot organlari xodimlari yetib kelib, gumonlanuvchilarni, shuningdek, mojaro joyida bo‘lgan fuqarolarni — jami 65 kishini politsiya bo‘limiga olib kelgan”, — deya ta’kidlanadi elchixona xabarida.
Diplomatik missiya Rossiya huquq-tartibot organlaridan tergov doirasida Tojikiston fuqarolarining huquqlarini qonunan himoya qilishni so‘ragan. Zarurat tug‘ilganida, konsullik xizmati tojikistonliklarga yuridik yordam ko‘rsatishga tayyor.
“TASS”ning IIV Moskva shahri bo‘yicha bosh boshqarmasi matbuot xizmatiga tayanib yozishicha, janjal maishiy sabab yuzaga kelgan. Qo‘lga olinganlar ma’muriy javobgarlikka tortilgan. Uch kishiga nisbatan “bezorilik” moddasi bo‘yicha jinoyat ishi qo‘zg‘atilgan.
Eslatib o‘tamiz, 2021-yilning avgustida Rossiya hukumati Moskvadagi “Kuzminki” metro bekati yaqinida ommaviy mushtlashuv sodir etgan muhojirlarning 46 nafarini mamlakatdan deportatsiya qilgandi. O‘shanda dastlab mojaro O‘zbekiston va Qirg‘iziston fuqarolari o‘rtasida chiqqani aytilgandi. O‘zbekiston Tashqi migratsiya agentligi Rossiya Ichki ishlar vazirligi xodimlari bilan muloqotda bo‘lib, vaziyatni o‘rgandi va mojaroda o‘zbekistonliklar ishtirok etmaganini ma’lum qildi. Mushtlashuv Tojikiston va Qirg‘iziston fuqarolari o‘rtasida yuz bergan.
Izoh (0)