Buyuk Britaniya bosh vaziri Boris Jonson Kiyevga tashrif buyurdi, deb xabar beradi “Unian” agentligi. U Ukraina prezidenti Vladimir Zelenskiy bilan muzokaralar o‘tkazgan.
Ma’lumotlarga ko‘ra, muzokaralar yakuni bo‘yicha tomonlar qo‘shma bayonot bilan chiqqan bo‘lib, unda Rossiyaning Ukrainaga keng ko‘lamli harbiy bosqini “ulkan strategik xato” bo‘lishi va o‘z ortidan “jiddiy gumanitar oqibatlarni” yuzaga keltirishi ta’kidlangan. Bayonotda qayd etilishicha, Buyuk Britaniya “Rossiyaning davom etayotgan tajovuzi qarshisida Ukraina bilan yelkama-yelka turishga tayyorligini” bildirgan.
Uchrashuvdan keyin o‘tkazilgan matbuot anjumanida Jonson Rossiyaga qarshi sanksiyalar “rossiyalik askarning oyog‘i Ukraina chegarasini kesib o‘tishi va uning hududiga kirgan daqiqadanoq” kuchga kirishini ma’lum qilgan. Uning ta’kidlashicha, ushbu sanksiyalar AQSh bilan kelishilgan. Jonsonning so‘zlariga ko‘ra, sanksiyalar “Rossiyaga dushmanlik qilish” maqsadida emas, balki Ukraina ozodligini himoya qilishga sodiqligini namoyish etish maqsadida qo‘llanadi.
Shuningdek, Jonson Ukrainaning Rossiya energiya tashuvchilariga qaramligini qisqartirish maqsadida 88 million funt sterling miqdorida moliyaviy yordam ko‘rsatgan.
31-dekabr kuni Jonson va Rossiya prezidenti Vladimir Putin o‘rtasida telefon muloqoti rejalashtirilgan edi. Jonsonning shu kuni parlamentda chiqishi borligi sabab u amalga oshmay qolgan. Bosh vazir imkoni bo‘lishi bilan muloqotga kirishishga va’da bergan.
Avvalroq Yevrokomissiya Ukrainaga 1,2 milliard yevro ajratishni ma’qullagani, Buyuk Britaniya bosh vaziri Ukraina atrofidagi vaziyat sabab Yaponiyaga tashrifini bekor qilgani, Polsha Ukrainaga dronlar, o‘q-dori va zenit-raketa majmualaridan iborat harbiy yordam yubormoqchiligi to‘g‘risida xabar berilgandi.
Izoh (0)