Kanada bosh vaziri Jastin Tryudoda koronavirus aniqlandi. Bu haqda uning o‘zi Twitter’dagi sahifasi orqali ma’lum qildi.
“Bugun ertalab COVID-19 ga topshirgan testim javobi ijobiy chiqdi. O‘zimni yaxshi his qilyapman va shu hafta sog‘liqni saqlash qoidalariga rioya qilgan holda masofadan turib ishlashni davom ettiraman”, — deb yozadi Tryudo.
U fuqarolarni koronavirusga qarshi emlanishga va revaksinatsiyadan o‘tishga chaqirgan.
27-yanvar kuni Tryudo infeksiyaga chalingan fuqaro bilan aloqada bo‘lgani sabab o‘zini yakkalash rejimiga o‘tgandi. Bosh vazirning farzandlaridan birida ham koronavirus aniqlangan.
Shuningdek, Gruziya bosh vaziri Irakliy Garibashvilida yana koronavirus tasdiqlandi. Hozirda u masofadan turib o‘z ishini davom ettirmoqda.
Gruziya hukumati matbuot xizmatining ma’lum qilishicha, bosh vazirda COVID-19 ning omikron shtammi aniqlangan. “Hukumat rahbari o‘zini yaxshi his qilmoqda va masofadan turib ishlashni davom ettiryapti”, — deyiladi xabarda.
Matbuot xizmatining ta’kidlashicha, Garibashvili to‘liq vaksinatsiyadan o‘tgan, koronavirus esa rejali testdan o‘tish doirasida aniqlangan. Bu Gruziya bosh vazirining ikkinchi bor koronavirusga chalinishi. Birinchi marta unda COVID-19 2021-yilning aprelida aniqlangan edi.
Avvalroq Armaniston bosh vaziri Nikol Pashinyan yana koronavirusga chalingani, Pentagon rahbari Lloyd Ostinda koronavirus aniqlangani, Braziliya prezidentida koronavirus tasdiqlangani to‘g‘risida xabar berilgandi.
Izoh (0)