Istanbul aeroporti 2021-yilning Yevropadagi eng gavjum havo bandargohi deb topildi. Bu haqda Yevropa xalqaro aeroportlar kengashi (ACI)ning hisobotiga tayanib, Anadolu agentligi xabar berdi.
Kengash ma’lumotlariga ko‘ra, Turkiya aeroportida yo‘lovchilar oqimi o‘tgan bir yil ichida qariyb 37 million kishini tashkil etgan. Ikkinchi o‘rinni 30,9 million yo‘lovchiga xizmat ko‘rsatgan Sheremetyevo (Moskva) egalladi. Reytingda uchinchi o‘rin Sharl-de-Goll nomidagi aeroportiga (Parij) nasib etdi — bir yil davomida 26,2 million yo‘lovchi. To‘rtinchi va beshinchi o‘rinlarni mos ravishda Sxipxol (Amsterdam) va Domodedovo (Moskva) aeroportlari band etgan.
Bloomberg reytingiga ko‘ra, 2020-yilda Londonning Xitrou aeroporti COVID-19 pandemiyasi tufayli Yevropadagi eng gavjum aeroportlar reytingidagi birinchilikni qo‘ldan boy bergandi. Uning o‘rnini Istanbuldagi 2018-yilda ochilgan yangi xalqaro aeroport egallagan edi.
Ma’lumotlarga ko‘ra, Xitrou’ning yo‘lovchi tashish hajmi 2020-yil mobaynida 73 foizga kamaygan. 2019-yilda mazkur aeroport xizmatidan deyarli 81 million kishi foydalangan bo‘lsa, 2020-yilda bu ko‘rsatkich atigi 22,1 million kishini tashkil qilgan.
Izoh (0)