Buyuk Britaniya Rossiyaning Ukrainaga tajovuzi yuz bergan taqdirda unga qarshi kiritiladigan sanksiyalar to‘g‘risidagi qonun loyihasini tayyorladi. Cheklovlar “Kreml uchun ahamiyatli” kompaniyalar va jismoniy shaxslarga ta’sir qiladi, deydi Buyuk Britaniya tashqi ishlar vaziri Liz Trass.
“Bu biz Rossiyaga nisbatan joriy qiladigan eng og‘ir sanksiyalar rejimi shuningdek, Yevropa Ittifoqidan chiqqanimizdan keyingi yondashuvimizdagi eng katta o‘zgarish bo‘ladi”, — dedi Trass.
Uning so‘zlariga ko‘ra, Britaniya ishlab chiqayotgan sanksiyalar paketi 10-fevralgacha tasdiqlanadi. London “Kremlning tajovuzkor va beqarorlashtiruvchi harakatlariga sherik bo‘ladigan”larga nisbatan cheklovlar qo‘yish vakolatiga ega bo‘ladi.
“Ularning Buyuk Britaniyadagi aktivlari muzlatiladi. Britaniya korxonalari yoki jismoniy shaxslari ular bilan bitim tuza olmaydi”, — dedi Trass. Cheklovlar Buyuk Britaniyaga kirishni taqiqlashni ham o‘z ichiga oladi.
London Moskvaga qarshi sanksiyalarni kuchaytirishga tayyorlanayotgani haqida Trass avvalroq e’lon qilgandi. Uning so‘zlariga ko‘ra, qonun loyihasi nafaqat Ukrainadagi vaziyatga aloqadorlarga, balki “rossiyalik oligarxlar” va “Kremlni qiziqtiradigan” har qanday kompaniyalarning mulkiga cheklovlar qo‘yishni nazarda tutadi. TIV rahbari “Rossiya davlatining tayanchi bo‘lib xizmat qilayotgan” jismoniy shaxslar va korxonalar “hech qayerga yashirina olmaydi”, deya va’da qildi.
The Times manbalariga ko‘ra, Britaniya Rossiya energetika kompaniyalariga qarshi sanksiyalar joriy qilishi mumkin. Cheklovlar iqtisodiyotning boshqa tarmoqlariga ham ta’sir ko‘rsatishi istisno qilinmayapti, deb yozadi gazeta.
Rossiya prezidenti matbuot kotibi Dmitriy Peskov Buyuk Britaniyadagi Rossiya biznesiga qarshi sanksiyalar tahdidi xalqaro moliya va biznes tuzilmalarini xavotirga solayotganini aytdi. U “Rossiya biznesiga hujum” qilingan taqdirda, Moskva javob choralarini ko‘rishiga va’da berdi.
Izoh (0)