Канада бош вазири Жастин Трюдода коронавирус аниқланди. Бу ҳақда унинг ўзи Twitter’даги саҳифаси орқали маълум қилди.
«Бугун эрталаб COVID-19 га топширган тестим жавоби ижобий чиқди. Ўзимни яхши ҳис қиляпман ва шу ҳафта соғлиқни сақлаш қоидаларига риоя қилган ҳолда масофадан туриб ишлашни давом эттираман», — деб ёзади Трюдо.
У фуқароларни коронавирусга қарши эмланишга ва ревакцинациядан ўтишга чақирган.
27 январь куни Трюдо инфекцияга чалинган фуқаро билан алоқада бўлгани сабаб ўзини яккалаш режимига ўтганди. Бош вазирнинг фарзандларидан бирида ҳам коронавирус аниқланган.
Шунингдек, Грузия бош вазири Ираклий Гарибашвилида яна коронавирус тасдиқланди. Ҳозирда у масофадан туриб ўз ишини давом эттирмоқда.
Грузия ҳукумати матбуот хизматининг маълум қилишича, бош вазирда COVID-19 нинг омикрон штамми аниқланган. «Ҳукумат раҳбари ўзини яхши ҳис қилмоқда ва масофадан туриб ишлашни давом эттиряпти», — дейилади хабарда.
Матбуот хизматининг таъкидлашича, Гарибашвили тўлиқ вакцинациядан ўтган, коронавирус эса режали тестдан ўтиш доирасида аниқланган. Бу Грузия бош вазирининг иккинчи бор коронавирусга чалиниши. Биринчи марта унда COVID-19 2021 йилнинг апрелида аниқланган эди.
Аввалроқ Арманистон бош вазири Никол Пашинян яна коронавирусга чалингани, Пентагон раҳбари Ллойд Остинда коронавирус аниқлангани, Бразилия президентида коронавирус тасдиқлангани тўғрисида хабар берилганди.
Изоҳ (0)