Birlashgan Millatlar Tashkilotining Xavfsizlik kengashi 31-yanvar kuni Ukraina atrofidagi vaziyat yuzasidan yig‘ilish o‘tkazishga qaror qilgan. Bu haqidagi qaror ovoz berish jarayonida ma’qullangan, deb yozmoqda “TASS”.
Avvalroq AQSh BMT xavfsizlik kengashi yig‘ilishida Ukraina masalasini muhokama qilish tashabbusi bilan chiqqandi. Muhokama jarayoni amalga oshishi uchun kengashga a’zo 15 mamlakat orasidan kamida 9 nafar ishtirokchi ushbu tashabbusni qo‘llab-quvvatlashi talab etilardi, deya qayd etgan agentlik. Ovoz berishda Rossiya hamda Xitoy bunga qarshi chiqdi, yana uch davlat betaraf bo‘lishga qaror qildi.
Yig‘ilishda BMT Xavfsizlik kengashi a’zolaridan tashqari Ukraina, Belarus, Litva va Polsha vakillari ham ishtirok etadi, deya e’lon qilgan Norvegiyaning BMTdagi doimiy vakili Mona Yuul.
Rossiyaning BMT huzuridagi vakili Vasiliy Nebeznya tashkilot xavfsizlik kengashining Ukraina masalasini megafon diplomatiya bilan namoyishkorona o‘tkazishini tanqid qilgan. Shuningdek, u AQSh yig‘ilish o‘tkazish taklifini berganida “Rossiya qo‘shinlarining Rossiya hududida turishi dunyo tinchligi va barqarorligiga zid ekanligi” qayd qilinganini ta’kidlagan. Uning so‘zlariga ko‘ra bu Rossiya ichki ishlariga aralashish va xalqaro jamoatchilikni mintaqadagi vaziyat yuzasidan chalg‘itishga urinish bo‘lishi mumkin.
Rossiya bir necha oydan buyon Ukraina bilan chegara hududiga qo‘shin joylashtirmoqda. G‘arb mamlakatning Ukrainaga hujum qilishidan xavotirda va Rossiyaga nisbatan yangi sanksiyalar qo‘llash bilan tahdid qilgan. Moskva ushbu gumonlarni inkor etib, qo‘shinning joylashtirilishi o‘quv mashg‘ulotlari ekanini bildirgan.
Ukraina atrofidagi vaziyat fonida yanvar oyida Yevropada xavfsizlik masalalari bo‘yicha muzokaralar boshlandi. Ushbu mavzu Yevropada xavfsizlik va hamkorlik tashkilotining Rossiya Kengashi — NATO yig‘ilishi doirasida Rossiya va AQSh vakillari ishtirokidagi uchrashuvda muhokama qilindi. Uchrashuv yakunlari bo‘yicha tomonlar masala yuzasidan o‘z pozitsiyalarini belgilay olmagan.
Avval Buyuk Britaniya bosh vaziri Boris Jonsonning Ukraina atrofidagi vaziyat sabab Yaponiyaga tashrifini bekor qilgani, Ukraina razvedkasining maxfiy materiallari Kiyevdan boshqa joyga ko‘chirilgani, Bayden tez orada Sharqiy Yevropaga qo‘shimcha kuchlar yuborilishini e’lon qilgani, Zelenskiy G‘arb diplomatlarining Ukrainadan evakuatsiya qilinishini xato deb atagani haqida xabarlar berilgan.
Izoh (0)