O‘zbekistonda xalq deputatlari kengashlarining ijtimoiy-iqtisodiy masalalarni hal qilishdagi vakolatlarini yanada kengaytirish rejalashtirilmoqda. Bu haqda “Yangi O‘zbekistonning 2022–2026-yillarga mo‘ljallangan taraqqiyot strategiyasi to‘g‘risida”gi prezidenti farmonidai so‘z boradi.
Hujjatga ko‘ra, ichimlik va oqova suv, ichki yo‘llar, boshqa infratuzilma obyektlarini qurish, bandlik dasturlarini tasdiqlashni tuman va shahar xalq deputatlari kengashlari vakolatiga o‘tkazish mo‘ljallangan. Shuningdek, hududlarda davlat ta’lim muassasalari, sog‘liqni saqlash obyektlarini qurish va ta’mirlashga ajratiladigan mablag‘larni taqsimlash vakolati viloyatlar va Toshkent shahar xalq deputatlari kengashlariga o‘tkaziladi.
Hududlarni kompleks ijtimoiy rivojlantirishga mas’ul bo‘lgan davlat organlari faoliyatini muvofiqlashtirish va tartibga solish tizimini qayta ko‘rib chiqish ham rejalashtirilgan. Mahalliy kengashlarning nazorat funksiyalarini kengaytirish, ularni tizimlashtirish maqsadida “Xalq deputatlari kengashlari nazorati to‘g‘risida”gi qonun loyihasi ishlab chiqiladi.
Tuman va shahar xalq deputatlari kengashlarida kamida 2-3 nafar deputat doimiy asosda ishlaydigan tartib joriy etiladi. Mahalliy kengashlar faoliyatining huquqiy asoslarini yanada takomillashtirishga qaratilgan “Xalq deputatlari viloyat, tuman, shahar kengashlari reglamenti to‘g‘risida”gi qonun loyihasi ishlab chiqiladi.
Avvalroq “Yangi O‘zbekistonning taraqqiyot strategiyasi” va uni 2022-yilda amalga oshirishga oid davlat dasturi tasdiqlangani to‘g‘risida xabar berilgandi. Farmonda O‘zbekistonni keyingi 5 yilda rivojlantirishning 7 ta ustuvor yo‘nalishi doirasida 100 ta maqsadlarga erishishga qaratilgan va 2022-yilda amalga oshirilishi lozim bo‘lgan 398 ta chora-tadbirlar nazarda tutilgan.
Rejalashtirilayotgan chora-tadbirlarni moliyalashtirishga 2022-yilda umumiy qiymati 55 trillion so‘m va 11,7 milliard dollar miqdoridagi mablag‘lar ajratilishi rejalashtirilgan.
Izoh (0)