Buxoro viloyatining Peshku tumanidagi “Navbahor” mahallasida yashovchi 24 yoshli fuqaro N.Z. hamda Toshkent shahrida istiqomat qiluvchi M.B.lar fuqaroni Milliy gvardiyaga ishga qo‘yish evaziga pora olayotgan vaqtda qo‘lga olindi, deya xabar berdi “Daryo” muxbiri.

Ta’kidlanishicha, holat viloyat huquqni muhofaza qilish idoralari hamkorligida o‘tkazilgan tadbirda fosh etilgan.

Tayinli ishi bo‘lmagan N.Z. fuqaro Ch.R.ning ishonchiga kirib, vakolatli tanishlari orqali uni 2100 dollar evaziga Milliy gvardiya tizimiga ishga joylashtirishni va’da qilgan. Va u Buxoro shahridagi “Grand Buxoro” mehmonxonasi oldida kimyoviy ishlov berilgan 1700 dollarni olgan vaqtida ashyoviy dalillar bilan qo‘lga olingan.

Holat yuzasidan huquq-tartibot idoralari tomonidan olib borilgan surishtiruv-tergov harakatlari davomida N.Z. ushbu pullarni Toshkent shahrida istiqomat qiluvchi M.B. ismli shaxsga yetkazishi lozimligi haqida ko‘rsatma bergan. Uning ko‘rsatmasi asosida huquq-tartibot organlari tomonidan tezkor tadbir davom ettirilgan. Tadbirda N.Z. fuqaro M.B.ga telefon orqali o‘zga bir shaxsni Milliy gvardiyaga ishga joylashtirish evaziga pul undirgani va bu pullarni unga yetkazishi haqida bildirgan. Toshkent shahar, Chilonzor tumanidagi “Buxoro—Toshkent” yo‘nalishi bo‘yicha harakatlanuvchi avtomashinalar turargohida M.B. ismli shaxs kimyoviy ishlov berilgan 2000 dollarni olayotgan vaqtida ushlangan.

Hozirda N.Z. hamda M.B. larga nisbatan Jinoyat kodeksining 168-moddasi (firibgarlik) 2-qismi “b” bandi bilan jinoyat ishi qo‘zg‘atilib, dastlabki tergov harakatlari olib borilmoqda.