Toshkent shahar hokimligi huzuridagi Raqamli rivojlanish departamenti Age Tashkent loyihasini ishga tushirdi. Bu haqda hokimlik axborot xizmati xabar qildi.
Ma’lum qilinishicha, loyiha yordamida tanlangan vaqt oralig‘ini yoki aniq yilni qo‘llagan holda Toshkentdagi binolarning yoshini aniqlash imkoniyati mavjud.
Qurilgan yiliga qarab barcha binolar turli ranglarda belgilangan. Ekranning o‘ng qismida berilgan diapazonda 1944 va 1998-yillar oralig‘ida qurilgan binolarni ko‘rsatib turuvchi “gradusnik” joylashgan. Qadimgiroq binolar to‘kiluvchi materiallar — ular qurilishida qo‘llanilgan somon va loy rangida aks ettirilgan. Sobiq SSSR davrini olovrang va qizil rang aks ettirsa, 1966-yildagi yer qimirlashidan keyin paydo bo‘lgan metro ko‘k rangda namoyon bo‘ladi. Mustaqillik yillariga och havorang belgi bo‘lsa, yangi O‘zbekiston davri yashil rangda bo‘yalgan.
Loyihadan foydalanish bo‘yicha oddiy yo‘riqnoma: xaritada sizni qiziqtirgan binoni toping, unga bosing va kerakli ma’lumotlarga – qurilish sanasi, binoning turi (turar joy binosi, ma’muriy bino) va boshqa ma’lumotlarga ega bo‘ling.
Ekranning chap qismidagi qulf belgisi Toshkentning chegaralarini yilidan kelib chiqib, ko‘rsatib bera oladi. Unda barcha tumanlar, shahar atrofidagi qal’a devori, 12 ta darvoza, shuningdek, madaniy meros obyektlarining arxeologik hamda ko‘chalarning zamonaviy nomlari ko‘rsatilgan.
Age Tashkent — Toshkent shahar hokimligi huzuridagi Raqamli rivojlanish departamenti o‘nlab mutaxassislari ishining natijasi hisoblanadi.
“Loyiha Toshkentning boy tarixi, uning me’moriy va arxeologik merosini shaxsan ko‘rib, haqiqiy baho berish imkoniyatini beradi”, — deyiladi xabarda.
Qurilmalar yoshini vizuallashtirish loyihasi Niderlandiyada ishlab chiqilgan, so‘ngra Yevropa va Rossiyada keng tarqalgan Building Age Maps chellenjidan namuna olingan. O‘zbekiston binolar yoshini ko‘rsatuvchi interaktiv xarita paydo bo‘lgan ilk Markaziy Osiyo mamlakati hisoblanadi.
Izoh (0)