Самарқандда «Ўзбекистон темир йўллари» акциядорлик жамиятида ишловчи 29 ёшли фуқаро мазкур жамиятига ишга киритиш учун 3 минг долларни олган вақтда ашёвий далиллар билан қўлга олинди. Бу ҳақда «Дарё»га Самарқанд вилояти ИИБ Транспортда хавфсизликни таъминлаш бошқармаси хабар берди.
Таъкидланишича, 2021 йилнинг 25 январь куни Самарқанд вилояти ИИБ ТХТБга Ж. исмли шахс ноқонуний равишда фуқароларни темир йўл корхона-ташкилотларига моддий манфаат эвазига ишга киритишни ваъда қилиб, пул олиб юргани тўғрисида маълумот келиб тушган.
Ушбу маълумотга асосан «Назорат остида харид қилиш» тезкор қидирув тадбири ташкил этилган бўлиб, унга жалб қилинган Б. исмли фуқародан Пастдарғом туманида яшовчи, «Ўзбекистон темир йўллари» ходими Р.Ж. 3 минг доллар эвазига ишга киритишни ваъда қилиб, бошланғич ҳужжатларини тайёрлаш учун 500 минг сўм миқдордаги пулларни олган вақтида ашёвий далиллар билан ушланган.
Суриштирув давомида Р.Ж. ушбу олган пулларининг бир қисмини Самарқанд шаҳрида яшовчи З.А. исмли шахсга (1985 йилда туғилган) беришини маълум қилган.
27 январь куни олиб борилган тезкор тадбир давомида З.А. тадбирга жалб этилган фуқаро Б.дан ишга киритиб қўйишга олдиндан келишилган 3 минг доллардан 1000 доллар миқдоридаги пулларни олаётган вақтида далилий ашёлар билан қўлга олинган.
Суриштирув давомида фуқаро З.А. муқаддам Жиноят кодексининг 167-моддаси (ўзлаштириш ёки растрата йўли билан талон-торож қилиш) 1-қисми ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) 1-қисми билан судлангани, ҳозирда вақтинча ишсиз экани аниқланган.
Мазкур ҳолат юзасидан терговга қадар текширув ҳаракатлари олиб борилмоқда.
Аввалроқ Самарқандда ишга жойлаш учун пора олган мактаб директори ва шифокор қўлга олингани, Бухорода ҳамшираликка ишга жойлаштириш учун 600 доллар олган бош шифокор ушлангани, Бухорода фуқарони Миллий гвардияга ишга қўйиш эвазига 2000 доллар олган шахслар қўлга олингани тўғрисида хабар берилганди.
Изоҳ (0)