O‘zbek futboli va sportiga oid 31-yanvarning eng muhim xabarlari bilan tanishing.
O‘zbekistonlik dzyudochilar Portugaliyada o‘tgan musobaqada 1 ta medalni qo‘lga kiritdi
Portugaliyaning Almada shahrida dzyudo bo‘yicha Gran-pri seriyasiga kiruvchi musobaqa bo‘lib o‘tdi. Unda ishtirok etgan O‘zbekiston terma jamoasi 1 ta oltin medal bilan turnirni yakunladi.
-73 kg vazn toifasida bahslarda ishtirok etgan Murodjon Yo‘ldoshev Finlyandiya, Niderlandiya, Gruziya, Mo‘g‘uliston va Ispaniya mamlakati vakillarini mag‘lubiyatga uchratib, oltin medalni qo‘lga kiritdi. Ushbu g‘alaba unga jahon tasnif jadvali uchun 700 ochko taqdim qildi.
Gandbol terma jamoasi Osiyo chempionatida 8-o‘rinni egalladi
Saudiya Arabistonida gandbol bo‘yicha erkaklar o‘rtasida Osiyo chempionati bo‘lib o‘tmoqda. Unda ishtirok etgan terma O‘zbekiston terma jamoasi musobaqani kuchli sakkizlikda tamomladi.
Yettinchi o‘rin uchun kechgan bellashuvda terma jamoa quvaytlik gandbolchilarga qarshi bahs olib bordi va 32:30 hisobida mag‘lubiyatga uchradi. Shu tariqa terma jamoamiz qit’a birinchiligini sakkizinchi o‘rinda yakunladi.
Qayd etish kerak, bu O‘zbekiston terma jamoasi uchun Osiyo chempionati tarixidagi eng yaxshi natija hisoblanadi.
O‘zbekiston Superkubogi—2022 ga Yaypan mezbonlik qiladi
O‘zbekiston Superkubogi—2022 o‘yini 27-fevral sanasida Yaypanda bo‘lib o‘tadi. Bu haqda PFL rasmiy saytida xabar berildi.
Superkubok uchun o‘yinda mamlakat chempioni “Paxtakor” va Kubok sohibi “Nasaf” o‘zaro bahs yuritadi.
“Turon” stadionidagi uchrashuv 27-fevral kuni soat 16:00 da boshlanadi.
“OKMK” Dubayda “Shabab Al-Ahli” bilan o‘rtoqlik o‘yini o‘tkazadi
BAAda yangi mavsumga tayyorgarlik doirasida o‘quv-mashg‘ulot yig‘inini o‘tkazayotgan “OKMK” 1-fevral BAAning “Shabab Al-Ahli” klubi bilan o‘rtoqlik o‘yini o‘tkazadi.
Qayd etish kerak, olmaliqliklar ushbu jamoa bilan umumiy hisobda uchinchi marotaba to‘qnash keladi. 2021-yili jamoalar OChL guruh bosqichida o‘zaro 2 bor kuch sinagan va unda tomonlar bir martadan g‘alaba qozongandi.
“Shabab Al-Ahli” ayni paytda BAA chempionatida 3-o‘rinni egallab turibdi.
Mazkur o‘yindan so‘ng “OKMK” BAAdagi o‘quv-mashg‘ulot yig‘inini yakunlab, 2- fevral kuni Toshkentga qaytadi.
Sardor Rashidov “Paxtakor”ga qaytdi
Yarim himoyachi Sardor Rashidov faoliyatini “Paxtakor”da davom ettiradi. Toshkent klubi matbuot xizmatiga ko‘ra, Rashidov bilan bir yillik shartnoma imzolangan, u 2022-yilgi mavsum so‘ngiga qadar “sherlar” sharafini himoya qiladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)