Португалияда олтин медал олган дзюдочи, Осиё чемпионатида 8 таликка кирган гандболчилар, Ўзбекистон Суперкубоги—2022 га мезбонлик қиладиган Яйпан. Энг сўнгги ўзбек спорти янгиликлари

Ўзбек футболи ва спортига оид 31 январнинг энг муҳим хабарлари билан танишинг.

Ўзбекистонлик дзюдочилар Португалияда ўтган мусобақада 1 та медални қўлга киритди

Португалиянинг Алмада шаҳрида дзюдо бўйича Гран-при сериясига кирувчи мусобақа бўлиб ўтди. Унда иштирок этган Ўзбекистон терма жамоаси 1 та олтин медал билан турнирни якунлади.

-73 кг вазн тоифасида баҳсларда иштирок этган Муроджон Йўлдошев Финляндия, Нидерландия, Грузия, Мўғулистон ва Испания мамлакати вакилларини мағлубиятга учратиб, олтин медални қўлга киритди. Ушбу ғалаба унга жаҳон тасниф жадвали учун 700 очко тақдим қилди.

Гандбол терма жамоаси Осиё чемпионатида 8-ўринни эгаллади

Саудия Арабистонида гандбол бўйича эркаклар ўртасида Осиё чемпионати бўлиб ўтмоқда. Унда иштирок этган терма Ўзбекистон терма жамоаси мусобақани кучли саккизликда тамомлади.

Еттинчи ўрин учун кечган беллашувда терма жамоа қувайтлик гандболчиларга қарши баҳс олиб борди ва 32:30 ҳисобида мағлубиятга учради. Шу тариқа терма жамоамиз қитъа биринчилигини саккизинчи ўринда якунлади.

Қайд этиш керак, бу Ўзбекистон терма жамоаси учун Осиё чемпионати тарихидаги энг яхши натижа ҳисобланади.

Ўзбекистон Суперкубоги—2022 га Яйпан мезбонлик қилади

Ўзбекистон Суперкубоги—2022 ўйини 27 февраль санасида Яйпанда бўлиб ўтади. Бу ҳақда ПФЛ расмий сайтида хабар берилди.

Суперкубок учун ўйинда мамлакат чемпиони «Пахтакор» ва Кубок соҳиби «Насаф» ўзаро баҳс юритади.

«Турон» стадионидаги учрашув 27 февраль куни соат 16:00 да бошланади.

«ОКМК» Дубайда «Шабаб Ал-Аҳли» билан ўртоқлик ўйини ўтказади

БААда янги мавсумга тайёргарлик доирасида ўқув-машғулот йиғинини ўтказаётган «ОКМК» 1 февраль БААнинг «Шабаб Ал-Аҳли» клуби билан ўртоқлик ўйини ўтказади.

Қайд этиш керак, олмалиқликлар ушбу жамоа билан умумий ҳисобда учинчи маротаба тўқнаш келади. 2021 йили жамоалар ОЧЛ гуруҳ босқичида ўзаро 2 бор куч синаган ва унда томонлар бир мартадан ғалаба қозонганди.

«Шабаб Ал-Аҳли» айни пайтда БАА чемпионатида 3-ўринни эгаллаб турибди.

Мазкур ўйиндан сўнг «ОКМК» БААдаги ўқув-машғулот йиғинини якунлаб, 2- февраль куни Тошкентга қайтади.

Сардор Рашидов «Пахтакор»га қайтди

Ярим ҳимоячи Сардор Рашидов фаолиятини «Пахтакор»да давом эттиради. Тошкент клуби матбуот хизматига кўра, Рашидов билан бир йиллик шартнома имзоланган, у 2022 йилги мавсум сўнгига қадар «шерлар» шарафини ҳимоя қилади.