O‘zbekiston terma jamoasi va “Nijniy Novgorod” klubi himoyachisi Ibrohimxalil Yo‘ldoshev O‘FA matbuot xizmatiga intervyu berdi.
Futboldagi ilk qadamlari haqida7-8 yoshimdan futbolga qiziqardim, lekin taekvondo bilan shug‘ullanardim. U yerda ham do‘stlarim bilan futbol o‘ynab turardik. 12 yoshimda taekvondoni tashlab, futbolga o‘tdim. Yangiyer shahrida futbol sirlarini o‘rganganman, ilk murabbiyim Ikrom Davlatov bo‘lgan. Yangiyerda bo‘lib o‘tgan musobaqada birinchi o‘rinni olgandik, Toshkentdan kelgan vakillar o‘yinimizni kuzatgandi. Musobaqadan so‘ng ular “Paxtakor”ga taklif qildi va Toshkentga bordim. Mashg‘ulotlardagi harakatimni ko‘rgan murabbiylar meni olib qoldi. 7-sinfda “Paxtakor” akademiyasiga qabul qilinganman.
Terma jamoadan taklif olgani haqida
U vaqtda “Bunyodkor”da edim. Qo‘ng‘iroq bo‘lgan va terma jamoaga chaqirilganimni xabar qilishgandi. Juda xursand bo‘lganman. Tojikistonga qarshi o‘rtoqlik uchrashuvida (2:1 hisobida O‘zbekiston g‘alaba qozongan) debyutimni nishonlaganman.
Terma jamoaning chap qanot himoyasidagi raqobat haqida
Albatta, sog‘lom raqobat bo‘lishi kerak. Chap qanot himoyasida uch kishimiz, Farrux Sayfiyev, Sherzod Nasrullayev va men. Murabbiyning aytgan vazifalarini bajarish kerak, shunda qiyin bo‘lmaydi.
Srechko Katanes haqida
Murabbiyning menga yoqqan jihati tartib-intizomga juda jiddiy qaraydi. Birinchi yig‘inda ham intizomga rioya qilishimiz, telefonga judayam berilib ketmaslikni talab qilgan.
“Nijniy Novgorod”ga moslashish haqida
Jamoaga kirishib ketish qiyin bo‘ldi. Mashg‘ulotlarda ishtirok etdim, jamoadoshlarim bilan chiqishib ketish qiyin kechdi. Vaqt o‘tgach, barchasi iziga tushdi.
“Nijniy Novgorod” murabbiyi Aleksandr Kerjakov haqida
Kerjakov jiddiy murabbiy. Mashg‘ulotlarga ham, futbolchilarning o‘ziga ham juda talabchan. Ikkita mashg‘ulotdan so‘ng asosiy tarkibga qo‘ydi, bu menga bo‘lgan ishonchning belgisi.
“Jenoa”dan bo‘lgan taklif haqida
“Jenoa”dan taklif tushgandi. Ammo ular meni xarid qilganidan so‘ng boshqa jamoaga ijaraga berib yubormoqchi edi. O‘sha vaqtda “Nijniy Novgorod”dan ham taklif tushgan. Ular agentim bilan aloqaga chiqqan, keyin Aleksandr Kerjakov bilan suhbatlashdim. Yevropaga ketishga ikkilandim. Ingliz tilida so‘zlasha olmayman, Yevropaga borsam, o‘yin amaliyotiga ega bo‘lmanmi-yo‘qmi, bilmayman, shuning uchun Rossiya variantini tanladim. U yerda tajriba to‘plab, keyin Yevropaga ketishim mumkin.
Ibrohimxalil Yo‘ldoshev, O‘zbekiston milliy terma jamoasi a’zosi
Eslatib o‘tamiz, O‘zbekiston terma jamoasi Dubaydagi yig‘in doirasida 23-yanvar kuni “Al-Vahda” jamoasi bilan o‘rtoqlik o‘yini o‘tkazib, 1:0 hisobida g‘alaba qozondi. 27-yanvar, payshanba kuni esa Janubiy Sudan 3:0 hisobida taslim etildi. Shuningdek, Dubaydagi yig‘in doirasida 1-fevral kuni Yangi Zelandiyaga qarshi o‘rtoqlik o‘yini o‘tkazish rejalashtirilgan.
Izoh (0)