“Real” va “Barselona” boy jamoalar bilan raqobatlashish uchun klubning 49 foiz ulushini sotishi mumkin

“Barselona” va “Real Madrid” klublar egalik qilish shaklini o‘zgartirish imkoniyatlarini o‘rganib chiqmoqda.

ABC xabariga ko‘ra, ular klubning 49 foiz ulushini yirik kompaniyalar yoki investitsiya fondlariga sotish g‘oyasiga qiziqib qolgan. Ispan grandlari milliarderlarga tegishli bo‘lgan yoki “Manchester Siti” va “PSJ” kabi butun mamlakatlar tomonidan qo‘llab-quvvatlanadigan klublar bilan raqobatlasha olish uchun bu g‘oyani ilgari surgan.

Qayd etilishcha, dastlab bu g‘oya kataloniyaliklar bosh direktori Ferran Reverterga tegishli bo‘lgan va u klubning moliyaviy muammolarini shu yo‘l bilan hal qil qilishni taklif etgan.

“Real” prezidenti Florentino Peresga ham ushbu g‘oya manzur kelgan: uning fikricha, “qirollik klubi” uchun uzoq muddatli istiqbolda bundan boshqa yo‘l yo‘q.

Loyiha hali boshlang‘ich bosqichida bo‘lib, buning uchun klub a’zolarining roziligi talab etiladi. “Barselona” ham, “Real” ham bu rejani amalga oshirishning eng yaxshi yo‘li — aksiyalarni ochiq tarzda sotish kerak deb hisoblaydi. Klublar bu orqali qimmatli qog‘ozlarning rus yoki arab oligarxlari qo‘liga tushib qolmasligini ta’minlamoqchi.

Ayni paytda har ikkala klub notijorat sport uyushmasi hisoblanadi, uning barcha a’zolar klubga egalik qiladi.