Conflict Intelligence Team (CIТ) тергов гуруҳи россиялик десантчилар Украина чегараси яқинига ташланаётганини маълум қилди.
24 январь куни TikTok ижтимоий тармоғида темир йўл бўйлаб ташилаётган ҳарбий техникалар видеоси пайдо бўлган. Таъкидланишича, мазкур ролик Беларусь ва Украина чегарасида жойлашган Брянск вилоятида тасвирга олинган.
Видеода техникалар ортилган ва брезент билан ёпиб қўйилган темир йўл таркибини кўриш мумкин. Тадқиқотчи Роберт Лининг сўзларига кўра, таркиб 31 та «БМД-4М» жанговар десант машиналари ва саккизда «БТР-МДМ» зирҳли транспортёрини ташиган.
«Бундан ташқари, поезд таркибида бешта йўловчи вагони ҳам бор бўлиб, у 250 дан ортиқ кишини ташишга имкон беради. Шунингдек, платформаларда ҳаво-десант кучлари учун мўлжалланган қисқартирилган икки ўқли саккизта ‘КамАЗ-43501’ юк машиналарини санадик», — дейилади CIТ хабарида.
Тергов гуруҳининг Россия темир йўллари маълумотлар базасига таяниб маълум қилишича, поезд Иванов вилоятидаги «Текстилний» станциясидан ҳаракатланган. Таъкидланишича, унинг ёнида 98-ҳаво-десант дивизиясининг 217-гвардия парашют-десант полка жойлашган. «Бу десантчиларнинг Укарина чегараси яқинига жойлаштирилаётганини исботловчи биринчи видео», — дея қўшимча қилади CIТ.
Аввалроқ Россия—Беларусь ҳарбийлари ўртасидаги қўшма ўқув машғулотлар 2022 йилнинг февралида ўтказилиши тўғрисида хабар берилганди. Беларусь президенти Александр Лукашенко 17 январь куни Минскда ўтказилган йиғилишда қўшма ўқув машғулотлари февралда бошланишини маълум қилган. Шунингдек, унинг сўзларига кўра, Болтиқбўйи давлатлари ва Польшанинг ўн минглаб ҳарбий хизматчилари эътибори Беларусь чегарасига қаратилган. 18 январь куни эса Россия Қуролли Кучларининг «Иттифоқчилик жасорати» қўшма ўқув машғулотларида иштирок этадиган илк бўлинмалари Беларусга етиб келди.
Изоҳ (0)