Қозоғистон ҳукумати истеъмолчиларни энергия билан таъминлаш масалалари ҳал этилганини маълум қилди, деб ёзмоқда Қозоғистон бош вазирининг матбуот хизматига таяниб, Tengrinews.
«2022 йил 25 январь куни маҳаллий вақт билан 11:59 да Нур-Султонда энергия истеъмоли тизимида электр таъминоти ўчиб қолган. Бунга Марказий Осиё энергия тизимидаги 500 киловаттли «Шимол–Шарқ–Қозоғистон жануби» электр транзитида юкламанинг ортиб кетиши сабаб бўлган.
Электр тармоқларига зарар етмаслигини таъминлаш ва «Шимол–Шарқ–Қозоғистон жануби» электр транзитида катта тизимли авария содир бўлишининг олдини олиш мақсадида аварияга қарши автоматик тизим ишлатилди, бу Қозоғистон жанубидаги аҳолининг электр таъминотидан узилиб қолишига олиб келди. Кутилмаган ҳодиса вазиятида Қозоғистон жанубидаги аҳолининг ўртача электр истеъмоли 3200 мегаваттни ташкил этган», – дейилади хабарда.
Қайд этилишича аварияга қарши автоматик тизим туфайли Жамбил ГРЭС, Чимкент-3 ва Қизилўрда 6-иссиқлик электр станциялари ҳамда Олмаотадаги электр станциянинг 1300 мегаватт ҳажмдаги истеъмолчилар электр таъминоти сақлаб қолинди. Мажбурий чекловлар 1900 мегаваттни ташкил қилган.
«Марказий Осиё энергия тизими учун меъёрий 50 Гц частота 47га тушиб кетган, оқибатда Ўзбекистон ва Қирғизистон энергия тизимлари ўчиб қолган», – дея қўшимча қилган Қозоғистон ҳукумати расмийлари.
Қозоғистон вақти билан соат 13:39 да Қозоғистон миллий электр тармоқларининг тузилмаси меъёрга келтирилган. Параллел равишда Қирғизистон энергия тизими ҳам қайта тикланган.
«Соат 14:53 да (Тошкент вақти билан 13:53 да) Олмаота шаҳри ва Олмаота вилоятидаги электр таъминотидаги муаммолар ҳам ҳал этилган.
15:10 да «Жамбил» ва «Чимкент» подстанцияларидаги кучланиш 500 киловаттга етди. Қозоғистон жанубидаги электр истеъмолчиларининг эҳтиёжлари соат 16:00 га бориб тўлиқ қондирилди.
Ўз вақтида кўрилган чора-тадбирлар натижасида электр таъминоти тикланди ва максимал даражада қисқа вақтда энергия тизими меъёрга келди ва истеъмолчилар учун электр етказиб бериш ишлари ташкил қилинди.
Ўзбекистон ва Қирғизистон энергия тизимиларида ҳам истеъмолчилар электр таъминотидан узилиб қолди. Қозоғистон томони билан параллел равишда амалга оширилган ишлар сабаб Ўзбекистонда ҳам авария оқибатлари бартараф этилган, ҳудудий станцияларда электр таъминотини босқичма-босқич улаш ишлари давом этмоқда», – дейилади Қозоғистон бош вазири матбуот котибининг баёнотида.
Ўзбекистонда нималар бўлди?
25 январь куни соат 11:00 ларда Ўзбекистоннинг қатор вилоятларида электр энергияси таъминоти узилди. Тошкент метрополитени фаолияти ҳам тўхтаган, Республикадаги барча поездлар ўз манзилларига кечикиб етиб бориши айтилди. Тошкент шаҳар ИИББ тибандликларнинг олдини олиш мақсадида кўчага зарурат бўлмаса, шахсий машинада чиқмасликни тавсия қилди.
Мавзуга доир: Электр тизимидаги узилишлар оқибатида етказилган зарар ҳисоб-китоб қилинади — Молия вазирлиги
Энергетика вазирлиги Тошкент вилоятидаги Чорвоқ, Ҳожикент ва Товоқсой гидроэлектр станциялари, Навоий вилоятидаги Навоий иссиқлик электр станцияси, Қорақалпоғистон Республикасидаги Тахиатош иссиқлик электр станцияси ҳамда Фарғона вилоятидаги Фарғона иссиқлик электр маркази орқали энергетика тизимига қувват узатиш бошланганини билдирди. «Дарё» нашри ходимлари ва ўқувчилари соат 14:00 ҳолатига Тошкент шаҳрининг айрим ҳудудларида электр таъминоти тикланганини хабар қилди.
Кейинроқ Президент матбуот котиби Шерзод Асадов «вазият шахсан президент назорати остида» эканини маълум қилиб, фуқароларни саросимага тушмасликка чақирди. Шавкат Мирзиёев топшириғи билан электр энергиясида кузатилаётган носозлик бўйича ҳукумат иштирокида комиссия тузилди.
17:00 да Энергетика вазирлиги Қорақалпоғистон ва Хоразмда электр энергияси тўлиқ тикланганини хабар қилди. 18:00 дан кейин Тошкент шаҳри ва Сирдарё вилоятининг бир қатор ҳудудларида ичимлик суви таъминоти тикланди. 19:00 да Тошкент ИЭСнинг фаолияти қисман тикланиб, 7 та энергоблокдан 5 таси барқарор иш фаолиятига келтирилгани маълум қилинди.
Шунингдек, 19:30 дан кейин Фавқулодда вазиятлар вазирлиги Қамчиқ довонидаги автойўл тунелларида ёритиш тизимлари тиклангани ҳақида хабар берди. Марказий Осиё ягона электр тармоғида 25 январь куни катта авария бўлиши оқибатида Ўзбекистоннинг Афғонистонга электр энергияси етказиб беришни тўхтатгани ойдинлашди.
Изоҳ (0)