“Kiberxavfsizlik to‘g‘risida”gi qonun loyihasi deputatlar tomonidan ko‘rib chiqilmoqda. Bu haqda Oliy Majlis Qonunchilik palatasi deputati Rasul Kusherbayev ma’lum qildi.
Kusherbayevning yozishicha, kiberxavfsizlik — axborot xavfsizligi bo‘lib, u shaxs, jamiyat va davlat manfaatlarini ichki va tashqi tahdidlardan himoya qilish holatini anglatadi. Yangi qonunning maqsadi:
- O‘zbekiston kibermakonida kiberxavfsizlik sohasidagi munosabatlarni tartibga solish;
- kiberxavfsizlik sohasidagi vakolatli organning vakolatlari, huquq va majburiyatlarini belgilash;
- milliy kiberxavfsizlik sanoatini rag‘batlantirish, rivojlantirish uchun huquqiy bazani yaratish: davlat tomonidan qo‘llab-quvvatlash choralarini ko‘rish, kiberxavfsizlik bo‘yicha mutaxassislar tayyorlash, milliy operatsion tizim va dasturiy ta’minotlar yaratish va boshqalardan iborat.
Avvalroq “Yangi O‘zbekistonning 2022—2026-yillarga mo‘ljallangan taraqqiyot strategiyasi to‘g‘risida”gi farmon loyihasida O‘zbekistonda kiberjinoyatchilikning oldini olish tizimi yaratilishi ma’lum bo‘lgandi. Qayd etilishicha, 2023—2026-yillar uchun O‘zbekistonning kiberxavfsizlik strategiyasi ishlab chiqiladi. Bunda “uz” domen zonasi internet-makonining kiberxavfsizligini ta’minlashning asosiy yo‘nalishlari belgilanadi. Elektron hukumat, energetika, raqamli iqtisodiyot tizimlari va muhim axborot infratuzilmasiga taalluqli boshqa yo‘nalishlarni himoya qilish bo‘yicha kompleks vazifalar tuzib chiqiladi.
Mavzuga doir:
- “O‘zbekiston kriptomaynerlar hujumiga eng ko‘p uchraydigan mamlakat”. Axborot xavfsizligi sohasi mutaxassisi bilan suhbat
- O‘zbekistonda 2021-yildan davlat organlarida ochiq kodli dasturiy ta’minotlardan foydalanish joriy etiladi
- Shavkat Mirziyoyev ShHT majlisida kibermakondagi tahdidlarga qarshi axborot xavfsizligi sohasidagi ekspertlar forumini ta’sis etishni ilgari surdi
Izoh (0)