Angrenda YPX xodimi haydovchiga nisbatan zo‘ravonlik qilib, Damas oynasini sindirgani aytilgan videoga izoh berildi

Ijtimoiy tarmoqlarda Angren shahrida YPX xodimi Damas haydovchisiga kuch ishlatgani tasvirlangan video tarqaldi. Toshkent viloyati IIBB axborot xizmati lavhadagi holat bir tomonlama yoritilganini ma’lum qilib, aslida, vaziyat qanday bo‘lgani tasvirlangan boshqa bir video bilan bo‘lishdi.

Ijtimoiy tarmoqlarda tarqalgan videoda YPX xodimi Damas haydovchisiga kuch ishlatib, uni mashinadan tushirishga uringani tasvirlangan.

Ikkinchi lavhada esa YPX inspektori haydovchiga “Xavfsiz hudud” maxsus tadbirida ekani haqida ma’lumot bergani, haydovchi esa u tarafga tamaki puflaganicha, hujjatlarni taqdim etishdan bosh tortganini ko‘rish mumkin. Inspektor xolislar ishtirokida bir necha marotaba yaxshi muomala bilan undan hujjatlarini taqdim etishini so‘ragan. So‘ng mashina eshigini ochishga uringan vaqtida esa haydovchi uning qo‘lini eshik oynasiga qisib olib tutqichni buragan.

“Endi xolis fikringizni ayting, shu vaziyatda YPX inspektori haydovchini tekshirmasligi, mayli, hujjat bermas ekanlar, deb qo‘yib yuborishi kerakmidi?”, — deb yozadi viloyat IIBB axborot xizmati rahbari Bobur To‘laganov.

Ta’kidlanishicha, “Xavfsiz hudud” tezkor profilaktik tadbiri odatda kriminogen vaziyati yuzasidan huquqbuzarlik yoki jinoyatchilik, nisbatan ko‘paygan hududlarda tashkil etiladi. Masalan, ushbu hududda qidiruvdagi jinoyatchi, huquqbuzar yoki noqonuniy mahsulotlarni olib o‘tish holatlari bor va maxsus nazorat tadbiri o‘tkazilyapti. “Shu kabi holatlarga chek qo‘yish maqsadida tadbirga jalb etilgan xodimlarga haydovchi hujjat bermasa, u tekshirilmay qo‘yib yuborilsa, keyinchalik shu yerda jinoyatchilikning avj olishi o‘zimizga yoki biror yaqinimizga ham ta’sir ko‘rsatmasligiga kafolat bormi?”, — deydi To‘laganov.

Shuningdek, u ayrim blogerlarni biror materialni e’lon qilishdan oldin tegishli tashkilot mas’ullari bilan bog‘lanib, aniqlashtirib olishga chaqirgan.

Avvalroq Sirdaryoda YPX xodimining “vstrechniy” yurgani tasvirlangan videoni tarqatgan haydovchi qamoqqa olingandi. Keyinroq viloyat IIB voqea aslida qanday bo‘lgani to‘g‘risida ma’lumot bergandi.