“Manchester Yunayted” hujumchisi Krishtianu Ronalduning jamoadoshlari bilan munosabatlari havas qiladigan darajada emas, deb yozmoqda The Athletic.
Manbaga ko‘ra, jamoaning bir qancha yosh futbolchilari portugaliyalik futbolchi bilan til topishish qiyin deb hisoblaydi.
Qayd etilishicha, hatto ingliz tilida bazo‘r gapiradigan hujumchi Edinson Kavani ham jamoani birlashtirish masalasida Krishtianudan ustunroq. Ba’zi manbalar Ronalduning hamyurtlari Brunu Fernandesh va Diogu Dalot bilan yaqinligi “Yunayted” kiyinish xonasida birdamlikning yo‘qolishiga olib kelganini ta’kidlamoqda.
Qolaversa, Ronalduning avvalroq yoshlar tanqidni yaxshi qabul qilmaydi, degan gaplari ham klubning ayrim futbolchilariga yoqmagan.
“Manchester Yunayted” Ronalduning 22-yanvar kuni bo‘lib o‘tadigan “Vest Hem”ga qarshi o‘yinda maydonga tushishi so‘roq ostida turganini ma’lum qildi. Klub saytiga ko‘ra, 36 yoshli hujumchi “Brentford” bilan bahsda bo‘ynini shikastlab olgan.
Ma’lumot uchun, Ronaldu 2021-yilning yozgi transferlar oynasida “Manchester Yunayted”ga qaytdi. U Premyer Liganing 2021/22-yilgi mavsumida 17 ta o‘yinda maydonga tushib, 8 ta gol va 3 ta golli uzatmaga mualliflik qildi.
Izoh (0)