«Манчестер Юнайтед» ҳужумчиси Криштиану Роналдунинг жамоадошлари билан муносабатлари ҳавас қиладиган даражада эмас, деб ёзмоқда The Athletic.
Манбага кўра, жамоанинг бир қанча ёш футболчилари португалиялик футболчи билан тил топишиш қийин деб ҳисоблайди.
Қайд этилишича, ҳатто инглиз тилида базўр гапирадиган ҳужумчи Эдинсон Кавани ҳам жамоани бирлаштириш масаласида Криштианудан устунроқ. Баъзи манбалар Роналдунинг ҳамюртлари Бруну Фернандеш ва Диогу Далот билан яқинлиги «Юнайтед» кийиниш хонасида бирдамликнинг йўқолишига олиб келганини таъкидламоқда.
Қолаверса, Роналдунинг аввалроқ ёшлар танқидни яхши қабул қилмайди, деган гаплари ҳам клубнинг айрим футболчиларига ёқмаган.
«Манчестер Юнайтед» Роналдунинг 22 январь куни бўлиб ўтадиган «Вест Ҳэм»га қарши ўйинда майдонга тушиши сўроқ остида турганини маълум қилди. Клуб сайтига кўра, 36 ёшли ҳужумчи «Брентфорд» билан баҳсда бўйнини шикастлаб олган.
Маълумот учун, Роналду 2021 йилнинг ёзги трансферлар ойнасида «Манчестер Юнайтед»га қайтди. У Премьер Лиганинг 2021/22 йилги мавсумида 17 та ўйинда майдонга тушиб, 8 та гол ва 3 та голли узатмага муаллифлик қилди.
Изоҳ (0)