“Surxon” vakillari va uning sobiq futbolchilari o‘rtasida vujudga kelgan mojaro bo‘yicha ma’lumot berildi.
2021-yilning 21-sentabr kuni O‘zbekiston futbol assotsiatsiyasi “Surxon” bosh direktori Azamat Abdurahmonov, klub sport direktori Abdumajid Toirov, futbolchilar Asror G‘ofurov, Javohir Esonqulov va Akrom Xo‘jayev o‘rtasida vujudga kelgan janjal bo‘yicha vaziyatga huquqni muhofaza qiluvchi organlar tomonidan aniqlik kiritilgunga qadar ularni futbol bilan bog‘liq har qanday faoliyatdan chetlatgan edi.
Tashkilot matbuot xizmatining yozishicha, mazkur vaziyat bo‘yicha 2022-yilning 14-yanvarida Toshkent shahar jinoyat ishlar bo‘yicha Mirzo-Ulug‘bek tuman sudi tomonidan qaror qabul qilingan va aybdorlarga nisbatan O‘zbekiston Respublikasining Ma’muriy javobgarlik to‘g‘risidagi kodeksining tegishli moddalariga asosan jarima jazosi tayinlangan. Tegishli ma’muriy jazo choralari ko‘rilganligi sababli ularga nisbatan qo‘llanilgan futbol bilan bog‘liq har qanday faoliyatdan chetlashtirilganligi to‘g‘risidagi qaror 2022-yil 20-yanvar kunidan boshlab bekor qilindi va ularning futboldagi faoliyatiga ruxsat berildi.
Eslatib o‘tamiz, 18-sentabr kuni “Surxon” sobiq futbolchisi, 24 yoshli Javohir Esonqulov kaltaklanganligi yuzasidan tegishli organlarga murojaat qilgani to‘g‘risidagi video tarqalgandi. Esonqulovning rafiqasi turmush o‘rtog‘i “Surxon” klubi binosida guruh bo‘lib, “dubinka” bilan kaltaklanganini ma’lum qilgandi. Shundan so‘ng Toshkent shahar IIBB mazkur holat yuzasidan tergov boshlagan edi.
Izoh (0)