“Pandemiya sharoitlari bo‘lmaganida, imtiyozli kreditlash siyosatidan voz kechgan bo‘lar edik” — Markaziy bank raisi

O‘zbekistonda pandemiya bilan bog‘liq vaziyat imtiyozli shartlar asosida kredit ajratish siyosatidan voz kechishni kechiktirdi. Bu haqda Markaziy bank Boshqaruvining 20-yanvar kuni asosiy stavkani yillik 14 foiz darajasida o‘zgarishsiz qoldirish to‘g‘risidagi qarori yuzasidan o‘tkazilayotgan matbuot anjumanida Markaziy bank raisi Mamarizo Nurmurodov ma’lum qildi.

“Imtiyozli kreditlar masalasida shuni qayd etishimiz lozimki, inflyatsion targetlash tizimiga o‘tish bo‘yicha prezident farmonida 2021-yildan barcha kreditlarni bozor foizlarda ajralishini, umuman bank tizimi faoliyatini, umuman kredit faoliyatini bozor tamoyillari asosida tashkil qilish bo‘yicha bizga topshiriq berilgan. Ming afsus, pandemiya bilan bog‘liq vaziyat bu holatni kechiktirishni taqozo qildi. Imtiyozli kreditlar ulushi jami kreditlar portfelida kamayib boryapti”, —  deydi u.

Mamarizo Nurmurodov bugungi kunda imtiyozli kreditlash jami kredit portfelida 32 foizni tashkil qilishini ta’kidladi.

“2018-yilda imtiyozli shartlar asosida 49 foiz kredit berilgan bo‘lsa, o‘tgan yili 24,6 foiz kreditlarimiz imtiyozli shartlarda berilgan. Agar pandemiya bilan bog‘liq vaziyat bo‘lmaganida, allaqachon imtiyozli shartlar asosida kredit ajratish siyosatidan voz kechgan bo‘lar edik. Bu yildan bizga berilgan topshiriq shuki, imtiyozni foizlarini pasaytirish orqali emas, foizlarga kompensatsiya to‘lash orqali berish siyosatiga o‘tish bugungi kundagi asosiy vazifamiz hisoblanadi”, — deydi Nurmurodov.

Avvalroq hunarmandchilik loyihalarini amalga oshirish uchun imtiyozli kreditlar ajratilishi haqida xabar berilgandi.