20-yanvar kuni “Sevimli” telekanali ta’sischilarining umumiy yig‘ilishi bo‘lib o‘tdi. Yig‘ilishga Kinematografiya agentligi bosh direktori Firdavs Abduxoliqov taklif qilingan. “Darakchi.uz”ning yozishicha, yig‘ilishda “Sevimli” telekanali bosh direktori va bosh muharriri vazifasidan ozod etilgan.
Ma’lum qilinishicha, yig‘ilishda tashkiliy masalalar ko‘rib chiqilgan. Kanal Kuzatuv kengashi raisi vazifasini bajaruvchi etib jamoatchilik fikri asosida Firdavs Abduxoliqov saylangan.
Ta’sischilarning qarori bilan bosh direktori vazifasini bajaruvchi Abduvohid Xo‘jayev va bosh muharrir Qahramon Saydaliyev o‘z vazifasidan ozod etilgan.
Yig‘ilishda shu paytga qadar Elektron ommaviy axborot vositalari milliy assotsiatsiyasi bosh direktori lavozimida ishlab kelayotgan Jaloliddin Safoyev kanal bosh direktori vazifasiga tayinlandi.
Yig‘ilishda so‘zga chiqqan Firdavs Abuxoliqov kanal efiriga uzatilgan “Sabriya” serialini badiiy saviyasini tanqid ostiga olib, “biz telekanal muxlislari va jamoatchilikdan uzr so‘raymiz va kelgusida yangi tayinlangan bosh direktor nafaqat seriallar, qolaversa, barcha media mahsulotlarning g‘oyaviy-badiiy jihatlariga mas’ul ekanligini uqtirgan holda barcha chora-tadbirlarni ishlab chiqishi zarur”, degan.
Ma’lumot uchun, “Sevimli” telekanali 2017-yil 1-aprel kuni “Karavan” nomi bilan o‘z faoliyatini boshlagan butun oila uchun mo‘ljallangan nodavlat musiqiy-ko‘ngilochar va ma’rifiy televizion kanal hisoblanadi. Wikipedia ma’lumotlariga ko‘ra, telekanal Firdavs Abduxoliqovga tegishli, hozirda unga Amira Rashidova — Abduxoliqovning qizi rahbarlik qilmoqda.
Avvalroq ijtimoiy tarmoqlarda “Sevimli” telekanalida efirga uzatilayotgan “Sabriya” serialidagi axloqsiz sahna aks etgan kadr tarqalgani, AOKA holat nazoratga olinib, tekshiruv ishlari boshlanganini ma’lum qilgandi. Bundan tashqari, Saida Mirziyoyeva ham ushbu serialni tanqid qilib, badiiy kengashlar va mutasaddi tashkilotlarni bu kabi kontentga qonun va etika nuqtayi nazaridan xulosa berishga chaqirgan.
Izoh (0)