Ўзбекистонда пандемия билан боғлиқ вазият имтиёзли шартлар асосида кредит ажратиш сиёсатидан воз кечишни кечиктирди. Бу ҳақда Марказий банк Бошқарувининг 20 январь куни асосий ставкани йиллик 14 фоиз даражасида ўзгаришсиз қолдириш тўғрисидаги қарори юзасидан ўтказилаётган матбуот анжуманида Марказий банк раиси Мамаризо Нурмуродов маълум қилди.
«Имтиёзли кредитлар масаласида шуни қайд этишимиз лозимки, инфляцион таргетлаш тизимига ўтиш бўйича президент фармонида 2021 йилдан барча кредитларни бозор фоизларда ажралишини, умуман банк тизими фаолиятини, умуман кредит фаолиятини бозор тамойиллари асосида ташкил қилиш бўйича бизга топшириқ берилган. Минг афсус, пандемия билан боғлиқ вазият бу ҳолатни кечиктиришни тақозо қилди. Имтиёзли кредитлар улуши жами кредитлар портфелида камайиб боряпти», — дейди у.
Мамаризо Нурмуродов бугунги кунда имтиёзли кредитлаш жами кредит портфелида 32 фоизни ташкил қилишини таъкидлади.
«2018 йилда имтиёзли шартлар асосида 49 фоиз кредит берилган бўлса, ўтган йили 24,6 фоиз кредитларимиз имтиёзли шартларда берилган. Агар пандемия билан боғлиқ вазият бўлмаганида, аллақачон имтиёзли шартлар асосида кредит ажратиш сиёсатидан воз кечган бўлар эдик. Бу йилдан бизга берилган топшириқ шуки, имтиёзни фоизларини пасайтириш орқали эмас, фоизларга компенсация тўлаш орқали бериш сиёсатига ўтиш бугунги кундаги асосий вазифамиз ҳисобланади», — дейди Нурмуродов.
Аввалроқ ҳунармандчилик лойиҳаларини амалга ошириш учун имтиёзли кредитлар ажратилиши ҳақида хабар берилганди.
Изоҳ (0)