Toshkentda vaksina olmagan mingdan ortiq xodim ishdan vaqtincha chetlatildi

Toshkentda vaksina olmagan 1 044 nafar xodim vaqtinchalik ishdan chetlatildi, 200 nafariga jarimalar qo‘llanildi, 1 ta obyektning ish faoliyati vaqtinchalik to‘xtatildi, deb xabar beradi O‘zA.

Ma’lum qilinishicha, 17-yanvar kuni ishchi guruhlar tomonidan 305 ta tadbirkorlik subyekti va 203 ta budjet tashkilotida tekshiruvlar o‘tkazilgan. Natijada tadbirkorlik subyektlarining 359 nafar, budjet tashkilotlarining 885 nafar xodimi vaksina olmagani aniqlangan.

Shuningdek, Milliy gvardiya tomonidan Toshkent shahrida faoliyat yuritayotgan 65 ta bozor, 31 ta istirohat bog‘i va xiyobonlar, 46 ta ommaviy tadbirlar o‘tkaziladigan obyektlar, 22 ta stadion va sport majmualari, 6 ta yirik savdo markazi va 131 ta jome masjidida fuqarolarga karantin qoidalariga rioya qilish yuzasidan targ‘ibot-tashviqot ishlari amalga oshirilgan.

Mazkur chora-tadbirlar poytaxt aholisi o‘rtasida koronavirus infeksiyasi keng tarqalishining oldini olishga qaratilgan bo‘lib, barcha fuqarolardan karantin talablari va sanitariya-gigiyena qoidalariga qat’iy rioya qilish so‘ralmoqda.

Ta’kidlanishicha, keyingi kunlarda Toshkent shahrida koronavirusga chalinish holati keskin ortib, bemorlar soni 5 ming 600 nafarga yetgan. Bugungi kunda bemorlarning 3 ming 297 nafari statsionar, 2 ming 216 nafari ambulator sharoitda davolanmoqda. Statsionarda sharoitda davolanayotganlarning 2 ming 935 nafarining ahvoli qoniqarli, 229 nafari og‘ir, 133 nafari o‘ta og‘ir ahvolda.

Epidemiologik vaziyat barqarorligini ta’minlash va axborotlarni muvofiqlashtirish maqsadida Toshkent shahar sog‘liqni saqlash bosh boshqarmasi va tumanlarda hududiy shtablar tashkil etilgan. Uyda davolanayotgan bemorlar va karantinga olingan shaxslarga tibbiy maslahat va axborot berish uchun onlayn poliklinika faoliyati yo‘lga qo‘yilgan. Tumanlarda 157 ta mobil guruhlar faoliyati qayta tiklangan.

Eslatib o‘tamiz, 13-yanvardan tumanlarda tun-u kun faoliyat ko‘rsatadigan 12 ta ixtisoslashtirilgan maxsus kovid poliklinikalari ish boshlagan. Har bir muassasaga shifokorlar bilan bir qatorda, tibbiyot oliy o‘quv yurtlarining yetakchi mutaxassislari ham jalb qilingan.