Тошкентда вакцина олмаган мингдан ортиқ ходим ишдан вақтинча четлатилди

Тошкентда вакцина олмаган 1 044 нафар ходим вақтинчалик ишдан четлатилди, 200 нафарига жарималар қўлланилди, 1 та объектнинг иш фаолияти вақтинчалик тўхтатилди, деб хабар беради ЎзА.

Маълум қилинишича, 17 январь куни ишчи гуруҳлар томонидан 305 та тадбиркорлик субъекти ва 203 та бюджет ташкилотида текширувлар ўтказилган. Натижада тадбиркорлик субъектларининг 359 нафар, бюджет ташкилотларининг 885 нафар ходими вакцина олмагани аниқланган.

Шунингдек, Миллий гвардия томонидан Тошкент шаҳрида фаолият юритаётган 65 та бозор, 31 та истироҳат боғи ва хиёбонлар, 46 та оммавий тадбирлар ўтказиладиган объектлар, 22 та стадион ва спорт мажмуалари, 6 та йирик савдо маркази ва 131 та жоме масжидида фуқароларга карантин қоидаларига риоя қилиш юзасидан тарғибот-ташвиқот ишлари амалга оширилган.

Мазкур чора-тадбирлар пойтахт аҳолиси ўртасида коронавирус инфекцияси кенг тарқалишининг олдини олишга қаратилган бўлиб, барча фуқаролардан карантин талаблари ва санитария-гигиена қоидаларига қатъий риоя қилиш сўралмоқда.

Таъкидланишича, кейинги кунларда Тошкент шаҳрида коронавирусга чалиниш ҳолати кескин ортиб, беморлар сони 5 минг 600 нафарга етган. Бугунги кунда беморларнинг 3 минг 297 нафари стационар, 2 минг 216 нафари амбулатор шароитда даволанмоқда. Стационарда шароитда даволанаётганларнинг 2 минг 935 нафарининг аҳволи қониқарли, 229 нафари оғир, 133 нафари ўта оғир аҳволда.

Эпидемиологик вазият барқарорлигини таъминлаш ва ахборотларни мувофиқлаштириш мақсадида Тошкент шаҳар соғлиқни сақлаш бош бошқармаси ва туманларда ҳудудий штаблар ташкил этилган. Уйда даволанаётган беморлар ва карантинга олинган шахсларга тиббий маслаҳат ва ахборот бериш учун онлайн поликлиника фаолияти йўлга қўйилган. Туманларда 157 та мобил гуруҳлар фаолияти қайта тикланган.

Эслатиб ўтамиз, 13 январдан туманларда тун-у кун фаолият кўрсатадиган 12 та ихтисослаштирилган махсус ковид поликлиникалари иш бошлаган. Ҳар бир муассасага шифокорлар билан бир қаторда, тиббиёт олий ўқув юртларининг етакчи мутахассислари ҳам жалб қилинган.