Namanganda o‘tgan yili 25 mingdan ortiq fuqarolik ishlari ko‘rib chiqildi. Bu haqda viloyat fuqarolik ishlari bo‘yicha sudlov hay’ati raisi Abdurahmon Safayev ma’lum qildi, deya xabar beradi “Daryo” muxbiri Azizbek Abduvaliyev.
Safayevga ko‘ra, 2020-yili bu ko‘rsatkich 11242 tani tashkil etgan. Ishlar soni ikki baravardan ham ortiq ko‘paygani sababli o‘tgan yili viloyatda har bir tumanlararo sudi sudyasining o‘rtacha oylik ish hajmi 216,7 ta (2020-yilda 116,0 ta) ishga teng bo‘lgan. Bu mamlakat bo‘yicha eng yuqori ko‘rsatkich.
“O‘tgan yili ko‘rib chiqilgan fuqarolik ishlarining salmoqli qismi kredit va qarz shartnomasidan kelib chiqqan nizolarga to‘g‘ri keldi. Ularning soni 2020-yildagi 1574 tadan 2021-yili 10463 taga yetdi, ya’ni olti baravar ko‘paydi. Buni fuqarolar pandemiya va karantin sabab olingan kredit summalarini tijorat banklariga o‘z vaqtida qaytarolmaganligi bilan izohlash mumkin”, — deydi Abdurahmon Safayev.
Sud mutasaddisining qayd etishicha, kredit va qarz shartnomasi bo‘yicha ishlarning 8673 tasi qanoatlantirilgan, 1765 tasi javobgar kredit qarzdorligini bartaraf etganligi uchun ko‘rmasdan qoldirilgan, 18 tasi ish yuritishdan tugatilgan va 7 tasi rad etilgan.
Izoh (0)