O‘zbekiston Fanlar akademiyasi akademigi, o‘zbek adabiyotshunosligidagi yirik olim Baxtiyor Nazarov 18-yanvarda 77 yoshida vafot etgandi. O‘zAning ma’lum qilishicha, uning vafoti munosabati bilan mamlakat rahbariyati, xususan, prezident Shavkat Mirziyoyev hamdardlik bildirdi.
Baxtiyor Nazarov 1945-yil 17-sentabrda Toshkent shahrida tug‘ildi. 1966-yili Toshkent davlat universitetini (hozirgi O‘zbekiston Milliy universiteti) tugatib, mehnat faoliyatini maktab o‘qituvchiligidan boshladi, keyinchalik O‘zbekiston Respublikasi Fanlar akademiyasi Til va adabiyot instituti (hozirgi O‘zbek tili, adabiyoti va folklori instituti) aspiranturasida ta’lim oldi. Dastlab nomzodlik, so‘ngra doktorlik dissertatsiyalarini himoya qildi. 2000-yilda O‘zbekiston Respublikasi Fanlar akademiyasi akademigi etib saylandi.Avvalroq akademik Saydiahrol To‘xtayev 79 yoshida, O‘zbekistonning faxriy jurnalisti Rustam Obidov 72 yoshida, akademiklar Temurbek Usmonov va Tolib Mo‘minov, Olim Mamatqul Jo‘rayev 65 yoshida vafot etgani to‘g‘risida xabar berilgandi.Iste’dodli olim o‘zining 55 yillik ilmiy pedagogik faoliyati davomida O‘zbekiston ensiklopediyasi tahririyati muharriri, Fanlar akademiyasi prezidenti maslahatchisi, bosh ilmiy xodimi, Fanlar akademiyasi Til va adabiyot instituti kichik, katta ilmiy xodimi, bo‘lim mudiri, ilmiy kotibi, direktori, Fanlar akademiyasi ijtimoiy-gumanitar fanlar bo‘limi ilmiy kotibi, bosh ilmiy kotib o‘rinbosari, O‘zbekiston Respublikasi Prezidentining davlat maslahatchisi, Oliy va o‘rta maxsus ta’lim vazirining birinchi o‘rinbosari lavozimlarida samarali mehnat qildi.
O‘zbek adabiy tanqidchiligining ilmiy asoslarini yaratish bo‘yicha fundamental tadqiqotlar olib borib, sohada yuqori malakali kadrlar tayyorlashga munosib hissa qo‘shdi. Xususan, uning rahbarligida 10 nafar fan doktori va 20 dan ziyod fan nomzodlari tayyorlangan.
Baxtiyor Nazarovning XX asr o‘zbek adabiyoti va hozirgi adabiy jarayonga oid ilmiy ishlari, darsliklari, o‘nlab monografiya va risolalari, 200 dan ortiq ilmiy maqolalari zamonaviy o‘zbek adabiyotining badiiy saviyasini baholashda o‘ziga xos o‘rin tutadi.
Akademik Baxtiyor Nazarovning mamlakatimiz ilm-fanini rivojlantirish borasidagi xizmatlari davlatimiz tomonidan munosib taqdirlandi. U “O‘zbekiston Respublikasi fan arbobi” faxriy unvoniga sazovor bo‘lgan edi.
Atoqli olim, mehribon ustoz, kamtarin inson Baxtiyor Nazarovning xotirasi qalblarimizda hamisha saqlanib qoladi.
Sh.Mirziyoyev, T.Norboyeva, N.Ismoilov, A.Aripov, B.Yo‘ldoshev, S.Saidov.
Izoh (0)