Navoiy viloyati Navbahor tumanida o‘zining fidoyiligi, mehnatsevarligi bilan o‘quvchilarga ta’lim va tarbiya berib kelayotgan ikki nafar o‘qituvchiga prezident sovg‘asi sifatida Cobalt avtomobili sovg‘a qilindi, deb xabar beradi Xalq ta’limi vazirligi.
Ta’kidlanishicha, avtomobil sovg‘asi topshirilgan 1-maktabning fizika fani o‘qituvchisi Sohiba Navro‘zova hamda 20-maktabning geografiya fani o‘qituvchisi Obidjon Saydahmetov o‘z faoliyatlari davomida yuzlab bitiruvchilarni oliy ta’lim muassasalariga o‘qishga kirishiga hissa qo‘shgan.
“Xususan, Navbahor tumanida o‘tgan 2021-yil bitiruvchilarining 76,6 foizi oliy ta’lim muassasalariga qamrab olingani ham o‘qituvchilarimizning yaratib berilayotgan imkoniyatlardan keng foydalangan holda o‘quvchilarga yuqori sifatda ta’lim berayotganidan dalolatdir. Aytish joizki, o‘qituvchilarga berilayotgan bunday e’tibor sohadagi islohotlarni yangi bosqichga ko‘tarishda o‘ziga xos motivatsiya bo‘lib xizmat qiladi”, — deyiladi xabarda.
Eslatib o‘tamiz, 2021-yilning martida Namangandagi maktabga 75 kilometr masofadan qatnab dars beradigan o‘qituvchiga poyezdda bepul qatnash imkoniyati berilgan edi. Shuningdek, ta’kidlash kerakki, o‘qituvchi boshqa tumanga ishlash uchun borganiga 50 foiz, boshqa viloyatga borganiga esa 100 foiz ustama haq to‘lanishi belgilangan. Qo‘shimcha to‘lanishi faqat oliy va birinchi toifali o‘qituvchilarga taalluqli.
Avvalroq XTV maktablarda geografiya fani soatlari qisqarayotganiga oid e’tirozlarga munosabat bildirgani, O‘zbekiston maktablarida endi jismoniy tarbiya fani haftasiga 2 soatdan o‘qitilishi to‘g‘risida xabar berilgandi.
Izoh (0)