Farg‘ona shahrida 6 kilogramm 90 grammli chaqaloq tug‘ildi. Bu haqda “Daryo”ga viloyat sog‘liqni saqlash boshqarmasi axborot xizmati rahbari Iqboljon Abdujabborov ma’lum qildi.
Qayd etilishicha, 18-yanvar kuni farg‘onalik Mavludaxon Xo‘jayeva Farg‘ona shahar tibbiyot birlashmasi tug‘uruq bo‘limida vazni 6 kilogramm 90 gramm, bo‘yi 60 santimetr bo‘lgan o‘g‘il chaqaloqni dunyoga keltirgan.
Farg‘ona shahar tibbiyot birlashmasi tug‘uruq bo‘limi bosh shifokori Shoira Ismoilovaning ma’lum qilishicha, chaqaloq 39-haftada jarrohlik amaliyoti yordamida tug‘ilgan. Hozirda ona va bolaning ahvoli yaxshi, ular shifokorlarning doimiy nazoratida.
Ta’kidlanishicha, ushbu chaqaloq mazkur tug‘uruq bo‘limida shu vaqtga qadar tug‘ilgan eng vazni og‘ir bola hisoblanadi. Bu yerda yirik vaznli chaqaloqlar tug‘ilishi holati ilgari ham kuzatilgan. Shifokorlarning qayd etishicha, bu yerda 5 kilogramm vaznli chaqaloq ham dunyoga kelgan.
Ma’lumot uchun, 33 yoshli Mavluda Xo‘jayevaning 3 nafar qizi bor, yangi chaqaloq esa uning to‘rtinchi farzandi hisoblanadi.
Eslatib o‘tamiz, O‘zbekistonda 2021-yilning yanvar—noyabr oylarida 16 ming 822 nafar egizak chaqaloq tug‘ilgan. 2021-yil 1-dekabr holatiga ko‘ra, O‘zbekistonda 832,4 ming tug‘ilish qayd etilgan. Noyabr oyining o‘zida esa respublikada jami 79 213 ta chaqaloq tug‘ilgan. Davlat statistika qo‘mitasi ma’lumotlariga ko‘ra, O‘zbekistonda 10 yil davomida uch nafar egizaklar tug‘ilishi 4 baravarga ko‘paydi. 2021-yilning birinchi yarmida egizaklar soni bo‘yicha Samarqand viloyati yetakchi bo‘lgan.
Izoh (0)