Xalq deputatlari Uchtepa tuman kengashining deputati Nuriddin Zaynitdinov o‘z lavozimini tark etib, O‘zLiDeP partiyasi safidan chiqmoqchiligini ma’lum qildi.
Deputatning so‘zlariga ko‘ra, u mazkur qarorni oxirgi voqealar fonida, shuningdek, prezident talablarini o‘z bilganicha ishlatadigan rahbarlar sabab qabul qilgan.
“Siyosiy byurtma bilan menga qarshi deputatlik faoliyatim uchun provokatsiyalar uyushtirilayotgani va menga bosim o‘tkazilayotgani, meni obro‘sizlantirish, nomimni bulg‘ashga urinishlar menga ishongan va meni saylagan xalqqa nisbatan qilingan xiyonatdir”, — deb yozadi Zaynitdinov.
“Gazeta.uz” nashri deputat bilan bog‘langan. U bu provokatsiyalar ortida “tuman va shahar hokimliklariga aloqador uch-to‘rt deputat” turgan bo‘lishi mumkinligini aytgan, biroq “axloqiy sabablarga ko‘ra” ularning ismlarini aytmagan.
Deputatning so‘zlariga ko‘ra, uning korrupsiyaga qarshi faoliyati, yer bilan bog‘liq muammolar va yanvar oyi boshida bo‘lib o‘tgan saylovlar bilan bog‘liq hodisa mahalliy hokimiyat vakillarining noroziligini keltirib chiqargan bo‘lishi mumkin.
Nuriddin Zaynitdinovning qayd etishicha, Uchtepa tumanida “tuman hokimi Farhod Abdullayevning tadbirkorlarga bolalar maydonchalari va ko‘kalamzorlashtirilgan hududlardan yer ajratish bo‘yicha ko‘plab qarorlari bekor qilingan”.
Deputat 26-mavze “Shirin” mahallasida 32, 22 va 23-uylar oralig‘idagi 0,2 gektar maydonda savdo-maishiy majmua va mehmonxona qurish rejalashtirilgan hudud aholisini faol qo‘llab-quvvatlagan edi. Tuman hokimi bu joyni “Obod mahalla” loyihasi doirasida “Bog‘ishamol” mahallasi binosi fasadini ta’mirlash evaziga tadbirkor Qahramon Abdurahmonovga ajratgan.
“Mahalla binosi fasadini ta’mirlash uchun bozor qiymati qariyb 400 ming dollar bo‘lgan 0,2 gektar yer maydoni ajratilgan. Bu qaysi mantiqqa mos keladi? Qolaversa, aholining uylari orasidagi yashil hudud sifatida foydalaniladigan joyda”, — deya norozi bo‘lgan deputat huquq-tartibot idoralaridan yer uchastkasi qanday asosda ajratilganini o‘rganishni so‘radi.
2021-yil may oyida tuman prokurorining protestidan keyin hokim 2020-yil 24-noyabrdagi qarorini bekor qilgan. Deputatning so‘zlariga ko‘ra, jami “20-30 ta noqonuniy yer ajratish bo‘yicha qarorlar” bekor qilingan.
Nuriddin Zaynitdinov, shuningdek, uni hech qanday isbot-dalil va asoslarsiz “Kompromatuz” Telegram-kanalida maktab o‘qituvchilari va maktabgacha ta’lim tashkilotlari tarbiyachilari “paravoz” uslubida tumandagi navbatdan tashqari saylovlarda “Adolat” partiyasidan nomzodlarga ovoz berishga majburlangani qayd etilgan postni yozganlikda ayblashganini ma’lum qilgan.
Oliy Majlis Qonunchilik palatasi deputati Rasul Kusherbayevning yozishicha, Zaynitdinovga nisbatan bosim va provokatsiyalar yaqinda tumanda bo‘shab qolgan o‘rinlarga deputatlik saylovlaridan so‘ng boshlangan. O‘shanda bo‘shagan uchta o‘rindan ikkitasini O‘zLiDeP qo‘lga kiritgandi.
Avvalroq Xalq deputatlari Andijon shahar kengashining 2021-yil 17-may kuni o‘tkazilgan navbatdagi sessiyasida deputatlar tintuvdan o‘tkazilgani, sessiyada, shuningdek, Andijonda yer sotuvchilarning kirdikorlarini fosh qilib yurgan deputat prokuror taqdimnomasiga ko‘ra daxlsizlik huquqidan mahrum qilingani to‘g‘risida xabar berilgandi. Keyinroq daxlsizligidan mahrum bo‘lgan deputat hokimlik va prokuratura bosim o‘tkazayotganini aytgan, Andijon shahar hokimi esa sessiyadagi holat deputatning obro‘sini saqlash maqsadida qilinganini bildirgan edi.
Izoh (0)