Dunyodagi eng keksa erkak, ispaniyalik Saturnino de la Fuente Garsiya 112 yoshida vafot etdi. Bu haqda Ginnesning rekordlar kitobi saytida 18-yanvar kuni chop etilgan xabarda aytilgan.
“Ginnesning rekordlar kitobi Saturnino de la Fuente Garsiya o‘z uyida 112 yil-u 341 kunlik yoshida vafot etganidan chuqur qayg‘uda”, — deyiladi xabarda. O‘lim sababi aytilmagan.
Saturnino 2021-yil sentabr oyida, 112 yosh-u 211 kunligida Ginnes rekordlari bo‘yicha dunyodagi eng keksa erkak deya e’lon qilingandi. Fevral boshida u 113 yoshga to‘lgan bo‘lardi.
U va rafiqasi Antoninaning yetti qizi, 14 nevarasi va 22 evarasi bor, deyiladi bayonotda.
Ginnesning rekordlar kitobidagi ma’lumotlarga ko‘ra, Saturnino 1909-yilda Ispaniyaning Leon shahrida tug‘ilgan. Bo‘yi past bo‘lgani uchun u Ispaniyadagi fuqarolar urushi davrida harbiy xizmatga olinmagan va poyabzal biznesini yo‘lga qo‘yib, askarlar uchun oyoq kiyim tikishni boshlagan.
Avvalroq Afg‘onistonning Samangan viloyatida mamlakatning eng keksa fuqarosi 144 yoshida vafot etgani haqida xabar berilgandi. Erkakning yoshi hujjatlashtirilmagan, uning hayoti haqidagi barcha ma’lumotlar faqat qarindoshlarining so‘zlariga asoslangan.
2021-yilning noyabr oyida filippinlik Fransiska Susano 124 yoshida vafot etgandi.
Izoh (0)