Дунёдаги энг кекса эркак, испаниялик Сатурнино де ла Фуэнте Гарсия 112 ёшида вафот этди. Бу ҳақда Гиннеснинг рекордлар китоби сайтида 18 январь куни чоп этилган хабарда айтилган.
«Гиннеснинг рекордлар китоби Сатурнино де ла Фуэнте Гарсия ўз уйида 112 йил-у 341 кунлик ёшида вафот этганидан чуқур қайғуда», — дейилади хабарда. Ўлим сабаби айтилмаган.
Сатурнино 2021 йил сентябрь ойида, 112 ёш-у 211 кунлигида Гиннес рекордлари бўйича дунёдаги энг кекса эркак дея эълон қилинганди. Февраль бошида у 113 ёшга тўлган бўларди.
У ва рафиқаси Антонинанинг етти қизи, 14 невараси ва 22 эвараси бор, дейилади баёнотда.
Гиннеснинг рекордлар китобидаги маълумотларга кўра, Сатурнино 1909 йилда Испаниянинг Леон шаҳрида туғилган. Бўйи паст бўлгани учун у Испаниядаги фуқаролар уруши даврида ҳарбий хизматга олинмаган ва пойабзал бизнесини йўлга қўйиб, аскарлар учун оёқ кийим тикишни бошлаган.
Аввалроқ Афғонистоннинг Саманган вилоятида мамлакатнинг энг кекса фуқароси 144 ёшида вафот этгани ҳақида хабар берилганди. Эркакнинг ёши ҳужжатлаштирилмаган, унинг ҳаёти ҳақидаги барча маълумотлар фақат қариндошларининг сўзларига асосланган.
2021 йилнинг ноябрь ойида филиппинлик Франциска Сусано 124 ёшида вафот этганди.
Изоҳ (0)