Birlashgan Arab Amirliklarining (BAA) poytaxti Abu-Dabiga faqat koronavirusga qarshi vaksinaning buster dozasi bilan emlangan odamlarning kirishiga ruxsat beriladi. Bu haqda Arab News xabar berdi.
Poytaxt hukumatining sog‘liqni saqlash dasturiga ko‘ra, shaharga tashrif buyuruvchilar buster doza bilan emlanganini ko‘rsatuvchi “yashil pasport”ni taqdim etishi shart. Shu bilan birga, vaksinaning ikkinchi dozasidan keyin kamida olti oy o‘tsa ham buster olmaganlar endilikda to‘liq emlangan deb hisoblanmaydi.
Bundan tashqari, Abu-Dabiga kirish uchun oxirgi ikki hafta ichida koronavirusga topshirilgan testning manfiy natijasi kerak. Abu-Dabi rasmiylari aholidan jamoat joylari yoki hukumat binolariga kirishdan oldin “yashil pasport”ini ko‘rsatishni talab qilmoqda.
Birlashgan Arab Amirliklari mamlakatga kirish niyatida bo‘lgan O‘zbekiston va Tojikiston fuqarolariga cheklovlar qo‘ygandi. Endi ushbu ikki mamlakat fuqarolari BAAga jo‘nab ketishdan 48 soat avval olingan PZR testning manfiy natijasini taqim etishi kerak. Bundan tashqari, Dubay va Sharjaga yetib kelgandan so‘ng, aeroportda yana PZR testidan o‘tadi.
Eslatib o‘tamiz, BAA dunyoda aholini emlash bo‘yicha eng yuqori ko‘rsatkichlarga ega davlat hisoblanadi. Sog‘liqni saqlash idoralari ma’lumotlariga ko‘ra, mamlakatda aholining 90 foizdan ortig‘i to‘liq emlangan.
Izoh (0)