Amerika aviakompaniyalari va yuk tashuvchilari AQSh prezidenti Jo Bayden administratsiyasini 5G aloqa tarmoqlari infratuzilmalarining aeroportlar yaqiniga joylashtirilishi yuzlab reyslarning bekor qilinishiga olib kelishi mumkinligi haqida ogohlantirdi, deb xabar beradi “Interfaks”.
Mahalliy OAVlar tayangan bu boradagi maktubni yirik aviakompaniyalar rahbarlari Oq uy Milliy iqtisodiy kengashi direktori Brayan Dizga, transport vaziri Pit Buttijichga, AQSh Fuqarolik aviatsiyasi federal boshqarmasi (FAA) rahbari Stiven Dikson va Aloqa bo‘yicha federal komissiya raisi Jessika Rozenvorselga yuborgan.
“Aviayo‘lovchilar, yuk jo‘natuvchilar, yetkazib berish zanjiri va zaruriy tibbiyot vositalarini yetkazishga ta’sir ko‘rsatadigan ishdagi sezilarli uzilishlardan qochish uchun zudlik bilan aralashuv kerak”, — deyiladi maktubda.
Unda ta’kidlanishicha, 5G yuzaga keltiradigan C-diapazon samolyotlardagi uskunlarning ishida uzilishlarni yuzaga keltiradi, bu esa o‘z navbatida AQSh havo flotida “ulkan uchastkalar”ning yaroqsizligiga sabab bo‘ladi.
Maktub mualliflari FAA samolyotlarning xavfsiz parvozi uchun boshqa usul topmaguniga qadar 5G aloqa tarmog‘ini aeroportlarga 2 mil masofaga yaqinlashtirmaslikka chaqirgan.
Fuqarolik aviatsiyasi federal boshqarmasi 16-yanvar kuni AQShdagi tijoriy samolyotlar parkining taxminan 45 foizi yangi 5G xizmatda aeroportlarga ko‘ruvchanlik past bo‘lgan sharoitda qo‘nishni amalga oshira boshlashini aytgan.
“Bu masalan, kecha 1,1 mingdan ortiq reys bekor qilingan, boshqa joyga yo‘naltirilgan yoki kechiktirilgan bo‘lishi mumkinligini anglatadi”, — deb yozadi Delta Airlines, United Airlines, FedEx, UPS va boshqa aviakompaniyalar rahbarlari tomonidan imzolangan xatda.
Izoh (0)