Россия Украинадан дипломатларини эвакуация қилмоқчи — NYT

Россиянинг Украинадаги иккита консулхонаси дипломатларига мамлакатни тарк этишга тайёрланиш буюрилди. Бу ҳақда The New York Times газетаси Украина хавфсизлик хизматининг юқори лавозимли амалдорига таяниб хабар берди.

Шу билан бирга, нашр манбасининг таъкидлашича, 5 январь куни Украинани, асосан, россиялик дипломатларнинг болалари ва рафиқаларидан иборат 18 киши тарк этган. Яқинда Киев ва Лвовдаги консулхоналардан яна 30 га яқин одам кетади, дея қўшимча қилди манба.

АҚШ расмий вакили Вашингтоннинг эвакуацияга тайёргарликдан хабари борлигини айтди. «Бизда Россия ҳукумати декабрь ойи охири ва январь ойи бошида Украинадаги элчихонасидан дипломатларнинг оила аъзоларини эвакуация қилишга тайёргарлик кўргани ҳақида маълумотлар бор», — дейилади баёнотда.

Шунингдек, унда таъкидланишича, Россия президенти Владимир Путин Украинага «босқин уюштириш» юзасидан ҳали якуний қарорга келмаган.

Кейинроқ Россия ташқи ишлар вазирлиги дилпоматларни эвакуация қилишга тайёргарлик ҳақидаги хабарга муносабат билдирди.

«Россиянинг Киевдаги элчихонаси одатий режимда ишламоқда», — дейилади вазирликнинг жавобида.

Украина чегараларидаги вазият 2021 йилнинг кузида, бир қанча хорижий ОАВ Россия Украинани босиб олишга тайёрланаётгани ҳақида хабар тарқатганидан сўнг кескинлашди. Кремль бир неча бор барча айбловларни рад этиб, Россия ҳудуди бўйлаб қўшинларнинг ҳаракатланиши унинг ички иши эканини таъкидлаган. Россия президенти Владимир Путин, ўз навбатида, Россия чегаралари яқинида НАТОнинг фаоллиги ортгани ҳақида гапирган.

Декабрь ойи ўрталарида Россия Ташқи ишлар вазирлиги АҚШ ва НАТОга хавфсизлик кафолатлари бўйича таклифлар юборганди. Уларда альянсни шарққа томон кенгайтирмаслик, хусусан, Украина ва Грузияни НАТОга қабул қилмаслик мажбурияти ҳақидаги банд бор эди. Ушбу масалалар бўйича 10 ва 12 январь кунлари Россиянинг Вашингтон ва НАТО билан музокаралари бўлиб ўтди. Россия ташқи ишлар вазири ўринбосари Сергей Рябков муваффақиятсиз якунланганини маълум қилди.