«Манчестер Юнайтед» ҳужумчиси Криштиану Роналду ESPN Brazil нашрига интервью берди. Унда футболчи жамоадаги ҳозирги ҳолати, танқидни кўтара олмайдиган ёшлар ва бошқа қатор масалаларга тўхталди.
Ральф Рангник ҳақида
У беш ҳафта аввал келди ва кўп нарсани ўзгартирди. Ғояларини футболчиларга сингдириш учун унга вақт керак. Рангник ўз ишини яхши уддалашига ишонаман. Энг зўр ўйинимизни намойиш этмаётганимизни биламан, аммо вазиятни ўнглаш учун олдинда ҳали ўйинлар бор.Футболчиларнинг руҳияти, ўйин услуби, тизимини ўзгартириш осон эмас. У буни уддалайди деб ўйлайман.
Оле-Гуннар Сульшер ҳақида
Мураббийнинг кетиши ҳар доим қайғули. У билан бирга ўйнаган даврларимиз, кейин у менинг мураббийимга айлангани ҳақида гаплашдик. У ажойиб инсон. Сульшер кетганида ҳаммамиз хафа бўлдик, аммо бу ҳаётнинг бир қисми. Барчаси ўхшамаётган бўлса, клуб ва мухлислар хоҳлаганидек ниманидир ўзгартиришга тўғри келади. Жуда хафа бўлдим, шу ўринда қарорни ҳам тўғри тушундим. Ҳаёт тўхтаб қолмайди.Янги мураббийнинг ғояларига кўникиш узоқ вақт олишини билардик. Дастлаб, Сульшернинг ўрнига Керрик келди, энди эса яна янги мураббий. Бунча кўп ўзгаришларга мослашиш қийин. Шундай бўлса ҳам яхши мавсум ўтказишга қодирлигимизга ишонаман.
Кучли тўртликка кириш учун руҳиятни ўзгартириш кераклиги ҳақидаМенимча, руҳият — энг муҳими. Бизнинг мақсадимиз минимум кучли учликка кириш бўлиши лозим. Бошқасига кўнмайман.
Нимадир яхши нарса қуриш учун ниманидир бузишга тўғри келади, деб ўйлайман. Шундай экан, нега йўқ бўлсин — янги йил, янги ҳаёт… «Манчестер Юнайтед» мухлислар орзу қилган даражага чиқа олади, деб ҳисоблайман. Улар бунга ҳақли. Ҳозир биз ўзгаришга қодирмиз. Буни қандай содир бўлишини биламан, лекин айтмайман, агар айтсам бу мен томонимдан қилинган ахлоқсизлик бўлади. Биз яхшироқ ўйнай олишимизни айта оламан, холос. Ҳозирги ҳолатимизни ўзгартиришимиз даркор.
Олтинчи, еттинчи ёки бешинчи ўринни эгаллашни истамайман. Мен ғолиб бўлиш, рақобат қилиш учун бу ердаман. Рақобат таклиф қилишга қодирмиз, лекин ҳали ўзимизнинг энг яхши даражамизга чиқмадик. Ҳали кўп нарсаларни қўшишимиз керак. Биз ҳаммамиз жамоа энг яхши бўлиши учун шу ердамиз. Шундай экан бу билан шуғулланиш керак.
Янги йил кириб келди, янги саҳифани варақлаяпмиз. Бизда ғалаба қозониш учун кўп нарса бор. Бунга ишонишимиз лозим, акс ҳолда — бу даҳшатли кўриниш олади.
Жисмоний ҳолати ҳақида
Генетик жиҳатдан ўзимни 30 ёшдек ҳис қиламан. Ўз танам ва ақлим ҳақида диққат билан қайғураман. Яқинда инсоннинг танаси 33 ёшдан кейин исталган вазифани бажариши мумкинлиги, ақл жанги эса ҳақиқий уруш эканлигини тушундим.
Энг қийини — шунча қийинчиликлардан сўнг битта мақсадга диққатни қаратиш, юқори даражада қолиш. Охирги йилларда айнан шу билан шуғулланяпман. Ақлим билан кўпроқ ишлайман. Танам таклиф қилган нарсамни қабул қилишини биламан, чунки унга ҳурмат билан муносабатда бўламан ва унинг огоҳлантиришларига қулоқ соламан.
Ҳаётда турли лаҳзалар бўлади, яхши ва ёмон, аммо йиқилгандан сўнг ўрнингдан туришга куч бўлиши керак. Бахтлиман ва футболда қолишни истайман, кўрамиз, бу нимага олиб боради. 40, 41, 42 ёшгача футбол ўйнай оламанми, йўқми, билмоқчиман. Лекин энг асосийси — бўлаётган нарсалардан лаззатланиш.
Жамоага ёрдам бериши ҳақидаБунга тўғри муносабатда бўлиш лозим. Ўзимга қарайман ва ўйлайман: «Криштиану, ўз даражангни ошириш ва жамоага ёрдам бериш учун нима қилишинг керак? Ҳа, мен бирор нарсада яхшироқ бўлишим мумкин». Ўйин давом этар экан, баъзи жойларда ақллироқ ва айёрроқ бўлиш керак.
Барча ўйинлар турли хил, футболчилар ҳар хил, барча ўзи хоҳлаган схемада ўйнайди, стадионлар ҳам турлича. Ўйин вақтида омад келмаган пайтларда азобланишга тайёр бўлиш керак, жамоавий ўйнаш учун барча бирдам бўлиши лозим. Айнан шунинг учун жамоа номи «Манчестер Юнайтед». Биз бирдам бўлишимиз керак.
Ёшлар танқидни кўтара олмай қолгани ҳақида
Ёши катта ва етук футболчилар доим ёшларга ёрдам бериши мумкин. Тўғри, истисно ҳолатлар бўлиши мумкин. Масалан, мен маслаҳат бердим, лекин уни ҳаётимга татбиқ этмаганман, бу масалада унга маслаҳат бериш қийин бўлади. Инсон билан кун бўйи гаплашиб ўтириш мумкин. Агар ичида ҳеч нима бўлмаса, барчаси бекор. 18, 19, 20 ёшимда катталар мен билан суҳбатлашганини эслайман.
Ўзимга ўзим шундай дердим: «Криштиану, сенга ривожланиш зарурлигини биласан. Улар сендан тажрибали, кўп нарсани билади». Улар бошидан кўп ёмон вазиятларни ўтказган. Бошқалар эса танқидни тушунмайди. Буни жамоамдаги футболчиларга нисбатан эмас, умумий айтмоқдаман. Фарзандларим бор, уларга нима деяётганимни биламан. Баъзида қаттиққўл бўлсанг улар аксини қилади. Суҳбатда оралиқни топа олиш муҳим.
Фикримча, ҳамма нарса ичингдан чиқиши керак. Ўзингдан фахрланишинг, ойнага қараб, ўзинг учун ҳамма нарсани берганингни айтишинг лозим. Ҳаммамиз шундай қилишимиз керак, деб ўйлайман. Шахсият — энг муҳими. Биз ёрдам бериш учун шу ердамиз. Кимгадир ёрдам, қўллаб-қувватлаш ёки маслаҳат керак бўлса мен биринчилардан бўлиб беришга тайёрман. Агар ёрдамим керак бўлмаса, ўз ишингни қил, ўзингни изла ва жамоага ёрдам бериш учун барча имкониятингни ишга сол.
ЖЧ—2022 ўтиш ўйинлари ҳақида
Агар биз Жаҳон Чемпионатига чиқа олмасак, жуда ачинарли бўлади, лекин у ерга боришимизга ҳамон ишонаман. Футболда ҳам, ҳаётда ҳам оғир дамлар бўлади, лекин йиқилганингда ўрнингдан туришинг керак.
Португалиянинг Жаҳон Чемпионатида иштирок этишига ишонаман. Олдинда бизни бир ёки иккита қийин жанг кутиб турганини биламиз. Ишонаман бунга.
Март ойида биз тайёр бўламиз, ҳақиқий жанг кечади. Ҳаёт ўзи шунақа, мукаммал сценарий йўқ. Биз уни қандай бўлса, шундайлигича қабул қилишимиз керак. Мартда биз тайёр бўламиз.
Криштиану Роналду, «Манчестер Юнайтед» ҳужумчиси
Изоҳ (0)