O‘zbekistonda 20-yanvarga qadar barcha tadbirkor va ishbilarmonlar o‘z qo‘l ostidagi xodimlarining koronavirusga qarshi vaksinalardan biri bilan emlanishini nazorat qilishi kerak. Bu haqda Sog‘liqni saqlash vazirligi xabar qildi.
Qayd etilishicha, hozirda pandemiyaning aholi turmush darajasi va mamlakat iqtisodiga salbiy ta’sirining oldini olish va ommaviy emlashga alohida e’tibor qaratilmoqda.
Bosh davlat sanitariya vrachining 2021-yil 17-iyuldagi 11-son qarorida 18 yoshdan katta aholi qatlamini koronavirus infeksiyasiga qarshi emlash belgilangan. Mehnat kodeksi 113-moddasiga ko‘ra, xodim emlanishni rad etsa, ish beruvchi uni ishga qo‘ymaslikka haqli.
Shunga ko‘ra, ish beruvchilardan 2022-yil 20-yanvarga qadar koronavirusga qarshi emlanishini ta’minlashi hamda sababsiz emlanmaganlarni ishga qo‘ymaslik choralarini ko‘rish so‘ralgan.
Eslatib o‘tamiz, 7-yanvar kuni O‘zbekistonda koronavirusning omikron shtammi aniqlangandi. Shundan buyon koronavirusga chalinganlar soni orta boshladi. 8-yanvar kuni 369 kishida, 9-yanvarda 389 kishida, 10-yanvarda 425 kishida, 11-yanvarda 604 kishida, 12-yanvarda 714 kishida kasallik tasdiqlandi.
Shu sababli Respublika maxsus komissiyasining qarori bilan 15-yanvardan boshlab mamlakatda bir qator cheklovlar joriy etiladi. Jumladan, turli tadbirlar tashkil etish taqiqlanadi, emlanmagan xodimlar ishga qo‘yilmaydi. Oliy ta’lim muassasalari talabalari o‘rtasida ta’til davomida koronavirus infeksiyasiga qarshi to‘liq emlash choralari ko‘riladi.
Izoh (0)