Ўзбекистонда 20 январга қадар барча тадбиркор ва ишбилармонлар ўз қўл остидаги ходимларининг коронавирусга қарши вакциналардан бири билан эмланишини назорат қилиши керак. Бу ҳақда Соғлиқни сақлаш вазирлиги хабар қилди.
Қайд этилишича, ҳозирда пандемиянинг аҳоли турмуш даражаси ва мамлакат иқтисодига салбий таъсирининг олдини олиш ва оммавий эмлашга алоҳида эътибор қаратилмоқда.
Бош давлат санитария врачининг 2021 йил 17 июлдаги 11-сон қарорида 18 ёшдан катта аҳоли қатламини коронавирус инфекциясига қарши эмлаш белгиланган. Меҳнат кодекси 113-моддасига кўра, ходим эмланишни рад этса, иш берувчи уни ишга қўймасликка ҳақли.
Шунга кўра, иш берувчилардан 2022 йил 20 январга қадар коронавирусга қарши эмланишини таъминлаши ҳамда сабабсиз эмланмаганларни ишга қўймаслик чораларини кўриш сўралган.
Эслатиб ўтамиз, 7 январь куни Ўзбекистонда коронавируснинг омикрон штамми аниқланганди. Шундан буён коронавирусга чалинганлар сони орта бошлади. 8 январь куни 369 кишида, 9 январда 389 кишида, 10 январда 425 кишида, 11 январда 604 кишида, 12 январда 714 кишида касаллик тасдиқланди.
Шу сабабли Республика махсус комиссиясининг қарори билан 15 январдан бошлаб мамлакатда бир қатор чекловлар жорий этилади. Жумладан, турли тадбирлар ташкил этиш тақиқланади, эмланмаган ходимлар ишга қўйилмайди. Олий таълим муассасалари талабалари ўртасида таътил давомида коронавирус инфекциясига қарши тўлиқ эмлаш чоралари кўрилади.
Изоҳ (0)