So‘nggi haftada dunyo bo‘ylab 15 milliondan ortiq odam COVID-19 bilan kasallangan, bu butun pandemiya uchun rekord ko‘rsatkichdir, deyiladi Jahon sog‘liqni saqlash tashkiloti (JSST)ning haftalik hisobotida. Unda qayd etilishicha, 3—9-yanvar haftasida kasallanishlar soni 55 foizga oshgan, o‘lim darajasi deyarli o‘zgarishsiz qolgan.
JSSTning oltita hududidan beshtasi kasallanishlar sonining ortgani to‘g‘risida xabar qilgan, faqatgina Afrikada 11 foizga pasayish qayd etilgan. O‘tgan hafta yangi yuqtirish holatlarining eng katta o‘sishi Janubi-Sharqiy Osiyo mintaqasida kuzatildi — 418 foiz, G'arbiy Tinch okeani mintaqasida esa bu ko‘rsatkich 122 foizni tashkil etdi.
Shu bilan birga, Afrikada (84 foizga) va Amerikada (26 foizga) o‘lim holatlari sezilarli darajada oshgan, Yevropada o‘lim darajasi 10 foizga, Janubi-Sharqiy Osiyoda 6 foizga, Sharqiy O‘rta Yer dengizida esa 11 foizga kamaygan, deyiladi hisobotda.
Bir hafta ichida JSSTga dunyo bo‘ylab 15 154 666 nafar odamda koronavirus aniqlangani, 43 461 nafar bemor vafot etgani haqida xabarlar kelib tushdi.
COVID-19 bilan kasallanish holatlarining ortishi ko‘p sonli mutatsiyalarga ega va yanada yuqumliroq hisoblanadigan omikron shtammining tarqalishi ortidan boshlandi. Jumladan AQShda 10-yanvar kuni 1,35 million kishida koronavirus infeksiyasi tasdiqlangan. Bu butun dunyoda pandemiya boshlanganidan buyon qayd etilgan sutkalik eng yuqori ko‘rsatkich.
Shuningdek, AQShda koronavirus bilan shifoxonaga yotqizilgan bemorlar soni ham pandemiya boshlanganidan buyon maksimal ko‘rsatkichga chiqqan. Mamlakat shifoxonalariga tibbiyot xodimlari yetishmayotgani tufayli hukumat koronavirus aniqlangan, biroq uning yengil shaklini boshdan o‘tkazayotgan tibbiyot xodimlariga professional majburiyatlarini bajarishga ruxsat berdi.
Avvalroq JSST ikki oy ichida Yevropa aholisining yarmi koronavirusning omikron shtammi bilan kasallanishini prognoz qilgan.
Izoh (0)