Qozog‘istonning birinchi prezidenti Nursulton Nazarboyevning to‘ng‘ich qizi, mamlakat senatining sobiq raisi Darig‘a Nazarboyeva koronavirusga chalindi. Bu haqda uning yordamchisi “Orda.kz” portaliga ma’lum qilgan.
“Og‘irlik darajasi o‘rtacha”, — degan Nazarboyevaning yordamchisi. Uning so‘zlariga ko‘ra, Nazarboyeva ayni damda “Olmaotadagi uyida”.
Qozog‘iston Majilisi (parlament quyi palatasi) matbuot xizmati ham uning kasallik ta’tilida ekanini va shuning uchun yig‘ilishda ishtirok etmaganini tasdiqlagan.
Darig‘a Nazarboyeva 1963-yilda Temirtau shahrida tug‘ilgan. U Lomonosov nomidagi Moskva davlat universitetini hamda Kirov nomidagi Qozog‘iston davlat universitetini (hozirgi Qozog‘iston milliy universiteti) tamomlagan.
U siyosatga 2000-yillarning o‘rtalarida kirib, parlament quyi palatasi deputati bo‘lgan. 2015—2016-yillarda Nazarboyeva Qozog‘iston bosh vaziri o‘rinbosari lavozimida ishlagan. 2016-yildan u parlamentning yuqori palatasiga kirdi hamda xalqaro ishlar, mudofaa va xavfsizlik qo‘mitasiga rahbarlik qila boshladi.
2019-yilning mart oyida Nazarboyeva Qozog‘iston parlamenti Senatining raisi etib saylangan. Uning Senat rahbari lavozimiga tayinlanishi, shuningdek, To‘qayevning prezident sifatida avval tayinlanib, so‘ng saylanishi Nursulotn Nazarboyev 2019-yilda iste’foga chiqishini e’lon qilganidan keyin hokimiyatdagi o‘tish davrida sodir bo‘lgan. Biroq 2020-yilning may oyida To‘qayev Darig‘a Nazabrayevaning senatorlik vakolatlarini muddatidan oldin tugatdi. O‘shanda buning sabablariga aniqlik kiritilmagan.
Nazarboyeva parlament raisligidan iste’foga chiqqach, uning ismi G‘arb matbuotida kenja o‘g‘li Aysulton Nazarboyevning bayonotlari munosabati bilan tez-tez tilga olinardi. 2020-yilning fevralida Aysulton “Rossiya va Qozog‘iston hukumati o‘rtasidagi yirik korrupsiya” va “xalqdan o‘g‘irlangan milliardlab dollarlar” haqida ma’lumotga ega ekanini ma’lum qilgan, shuningdek, Buyuk Britaniyadan siyosiy boshpana so‘ragan. Bir necha oy o‘tgach, Qozog‘iston birinchi prezidentining nabirasi Londonda yurak to‘xtab qolishi oqibatida vafot etgan.
Izoh (0)