Bugungi kunda har bir viloyat markazida bittadan shifoxonalar mavjud. Bu haqda Toshkent shahar sog‘liqni saqlash bosh boshqarmasi boshlig‘i Anvar Alimov 10-yanvar kuni bo‘lib o‘tgan brifingda ma’lum qildi, deya xabar berdi “Daryo” muxbiri.
“Xususan, Toshkent viloyatida Zangiota-1 va Zangiota-2 yuqumli kasalliklar shifoxonalari faoliyat ko‘rsatmoqda. ‘Omikron’ bilan kasallanganlar soni 1-bosqichda oshadigan bo‘lsa, bunga qarshi bizda 38 ta muassasada 12,6 mingta o‘rin zaxirasi bor, bundan 1300 tasi reanimatsiya o‘rinlari hisoblanadi. Agar kasallik yanada ko‘payadigan bo‘lsa, ikkinchi bosqichda respublika bo‘yicha zaxirada 19,8 mingta o‘rin yaratilishi rejalashtirilgan. Reanimatsiya uchun 2,1 mingta o‘rin tashkil etilishi ko‘zda tutilgan. Shuningdek, 100 ta kislorod stansiyasi barchasiga qo‘yilgan, 1400 ta kislorod beruvchi uskunalar shay”, — deydi u.
Anvar Alimovning so‘zlariga ko‘ra, shifoxonalarda ishlovchi barcha tibbiyot xodimlari sertifikat olgan, o‘qitilgan va ishga tayyor.
Eslatib o‘tamiz, mamlakatga kelgan xorijiy davlat fuqarosidan COVID-19 ning yangi “omikron” shtammi joriy yilning 7-yanvar kuni aniqlangan. Shu sababli barcha tashkilot, korxona va muassasalarda, yirik savdo majmualari, supermarketlar, ko‘ngilochar muassasalarning kirish qismida niqobda bo‘lish, ijtimoiy masofani saqlash, tana haroratini o‘lchash amaliyotiga qat’iy rioya etilishi ta’minlanadi.
Bugun bo‘lib o‘tgan brifingda, shuningdek, O‘zbekistonga “omikron” shtammi aniqlangan fuqaro bilan samolyotda birga kelgan 200 kishi karantinga olinganligi ma’lum qilindi.
Sanitariya-epidemiologik osoyishtalik va jamoat salomatligi xizmati boshlig‘ining birinchi o‘rinbosari Xolmamat Norboyev O‘zbekistonda qat’iy karantin cheklovlarini kiritish ko‘zda tutilmayotganini aytib o‘tdi.
Izoh (0)