O‘zbekistonga 2022-yil yanvar oyida Pfizer-BioNTech vaksinasidan 310 ming doza olib kelish ko‘zda tutilgan. Bu haqda Sog‘liqni saqlash vazirligi o‘tkazgan matbuot anjumanida Toshkent shahar sog‘liqni saqlash bosh boshqarmasi boshlig‘i Anvar Alimov ma’lum qildi, deya xabar bermoqda “Daryo” muxbiri.
Uning qayd etishicha, mamlakatda 2021-yil iyun oyining ikkinchi yarmidan boshlab kasallanish ko‘rsatkichlari o‘sgan.
Iyul oyida kasallik aniqlanishining yuqori cho‘qqisiga chiqqan. Avgust oyining birinchi yarmida biroz barqaror holat yuzaga kelgan. Avgust oyining ikkinchi yarmi va sentabr oyidan boshlab kasallik aniqlanishining pasayishi kuzatilgani hamda so‘nggi bir hafta davomida kasallanishning oshgani qayd etilgan.
O‘zbekistonda koronavirus bilan kunlik kasallanishlar soni 9-yanvarda 389 tani tashkil qildi. Shuningdek, 3 nafar koronavirusga chalingan bemor vafot etib, kasallikdan vafot etganlar soni 1497 nafarni tashkil qildi.
Avvalroq O‘zbekistonga 500 400 doza Moderna vaksinasi olib kelingani xabar qilingandi. Bu 2022-yil hisobidan keltirilgan ilk vaksina hisoblanadi.
Eslatib o‘tamiz, mamlakatga kelgan xorijiy davlat fuqarosidan COVID-19 ning yangi “omikron” shtammi 2022-yilning 7-yanvar kuni aniqlandi. Shu sababli 15-yanvardan turli tadbirlar tashkil etish taqiqlandi. Shuningdek, emlanmagan xodimlar ishga qo‘yilmaydi.
Izoh (0)