Бугунги кунда ҳар бир вилоят марказида биттадан шифохоналар мавжуд. Бу ҳақда Тошкент шаҳар соғлиқни сақлаш бош бошқармаси бошлиғи Анвар Алимов 10 январь куни бўлиб ўтган брифингда маълум қилди, дея хабар берди «Дарё» мухбири.
«Хусусан, Тошкент вилоятида Зангиота-1 ва Зангиота-2 юқумли касалликлар шифохоналари фаолият кўрсатмоқда. ‘Омикрон’ билан касалланганлар сони 1-босқичда ошадиган бўлса, бунга қарши бизда 38 та муассасада 12,6 мингта ўрин захираси бор, бундан 1300 таси реанимация ўринлари ҳисобланади. Агар касаллик янада кўпаядиган бўлса, иккинчи босқичда республика бўйича захирада 19,8 мингта ўрин яратилиши режалаштирилган. Реанимация учун 2,1 мингта ўрин ташкил этилиши кўзда тутилган. Шунингдек, 100 та кислород станцияси барчасига қўйилган, 1400 та кислород берувчи ускуналар шай», — дейди у.
Анвар Алимовнинг сўзларига кўра, шифохоналарда ишловчи барча тиббиёт ходимлари сертификат олган, ўқитилган ва ишга тайёр.
Эслатиб ўтамиз, мамлакатга келган хорижий давлат фуқаросидан COVID-19 нинг янги «омикрон» штамми жорий йилнинг 7 январь куни аниқланган. Шу сабабли барча ташкилот, корхона ва муассасаларда, йирик савдо мажмуалари, супермаркетлар, кўнгилочар муассасаларнинг кириш қисмида ниқобда бўлиш, ижтимоий масофани сақлаш, тана ҳароратини ўлчаш амалиётига қатъий риоя этилиши таъминланади.
Бугун бўлиб ўтган брифингда, шунингдек, Ўзбекистонга «омикрон» штамми аниқланган фуқаро билан самолётда бирга келган 200 киши карантинга олинганлиги маълум қилинди.
Санитария-эпидемиологик осойишталик ва жамоат саломатлиги хизмати бошлиғининг биринчи ўринбосари Холмамат Норбоев Ўзбекистонда қатъий карантин чекловларини киритиш кўзда тутилмаётганини айтиб ўтди.
Изоҳ (0)