Tibbiy niqob taqmagan fuqarolar avval ogohlantiriladi va niqob beriladi. Bu haqda 10-yanvar kuni AOKAda o‘tkazilayotgan matbuot anjumanida SSV huzuridagi Koronavirusga qarshi kurashish shtabi a’zosi Habibulla Oqilov ma’lum qildi, deya xabar bermoqda “Daryo” muxbiri.
Ta’kidlanishicha, Koronavirusga qarshi kurash bo‘yicha Respublika maxsus komissiyasining 9-yanvar kungi yig‘ilishida tibbiy niqob taqmagan fuqarolarga faqat ogohlantirish berilishi aytilgan.
“Bosh vazir boshchiligida Maxsus komissiya yig‘ilishida ichki ishlar, milliy gvardiya xodimlariga ko‘chada yurganda muomalani to‘g‘ri qilish tushuntirildi. Niqobsiz bo‘lgan fuqaroga, birinchidan, tushuntirish, ogohlantirish va faqatgina ogohlantirish beriladi. Xodimlarga niqobsiz fuqarolarga berish uchun kerakli miqdorda niqoblar tarqatilgan. Jarimalar to‘g‘risida hozircha gap yo‘q”, — dedi Habibulla Oqilov.
Mavzuga doir: SSV: O‘zbekistonga “omikron” shtammi aniqlangan fuqaro bilan samolyotda birga kelganlarning barchasi karantinga olingan
Sanitariya-epidemiologik osoyishtalik va jamoat salomatligi xizmati boshlig‘i o‘rinbosari, tibbiyot fanlari doktori, professor Nurmat Otabekov “omikron” boshqa shtammlarga qaraganda anchagina yuqumli va qisqa muddatda aholining katta qismini zararlashi mumkinligini aytgandi.
Shuningdek, emlanmagan xodimlar ishga qo‘yilmaydi. Vazirlik va idora rahbarlari, tashkiliy shaklidan qat’iy nazar, barcha tashkilotlarda ishchilarning emlangandan so‘ng ish joylariga kiritishga ruxsat beriladi. Tartibni buzgan tashkilot rahbarlariga nisbatan qonun hujjatlarida belgilangan tartibda qat’iy chora ko‘riladi.
Oliy ta’lim muassasalari talabalari o‘rtasida ta’til davomida koronavirus infeksiyasiga qarshi to‘liq emlash choralari ko‘riladi. Ushbu tadbirlarga OTM rahbarlari shaxsan mas’ul etib belgilanadi.
“Omikron” shtammi aniqlangani munosabati bilan 15-yanvardan boshlab mamlakatda bir qator cheklovlar joriy etiladi.
Innovatsion rivojlanish vazirligi huzuridagi Ilg‘or texnologiyalar markazi direktori Shahlo Turdiqulova ZF-UZ-VAC 2001 vaksinasining buster dozasi “omikron”dan deyarli 100 foiz himoya qilishini ma’lum qildi.
Izoh (0)