Бронксдаги кўп қаватли турар жой биносида содир бўлган ёнғин оқибатида 19 киши ҳалок бўлди. Бу ҳақда Нью-Йорк мери Эрик Адамс маълум қилди, деб хабар беради Associated Press агентлиги.
«Айни вақтда бизда 19 киши ҳалок бўлгани тасдиқланди ва яна бир неча киши оғир аҳволда», — дейди у.
Унинг сўзларига кўра, ҳалок бўлганлар орасида болалар ҳам бор. Адамснинг аниқлик киритишича, ёнғин 19 қаватли бинода содир бўлган. Мэр ёнғинни шаҳарда сўнгги 10 йилликда содир бўлган энг ҳалокатли ёнғинлардан бири деб атаган.
The New York Times маълумотларига кўра, ёнғин қурбонлари орасида тўққиз нафар бола ҳам бор. Нью-Йорк ҳукуматининг маълум қилишича, 60 дан ортиқ одам жабрланган бўлиб, уларнинг бештасида Бронкс шифохонасига ётқизилган.
Ёнғинни ўчиришга 200 га яқин ўт ўчирувчи жалб этилган. Шаҳар ёнғин ўчириш хизмати комиссари Даниэль Нигро брифинг вақтида ёнғин нима сабабдан юзага келганини очиқламаган. Унинг сўзларига кўра, ёнғин бошланган квартира эшиги очиқ қолдирилгани сабаб, тутун бутун бино бўйлаб тарқалган. «Ўт ўчирувчилар зинапояларнинг ҳар бир қаватида қурбонларни топди», — дейди Нигро.
Кейинроқ у ёнғин учинчи қаватдаги квартиралардан бирининг ётоқхонасига ўрнатилган носоз иситгич сабаб юзага келган бўлиши мумкинлигини айтган. NYT’нинг ёзишича, ёнғин 1972 йилда қурилган бинода содир бўлган, унда 120 та квартира жойлашган.
Маҳаллий амалдорлар мазкур ёнғинни 1990 йили Бронксдаги Happy Land тунги клубида содир бўлган фожиага қиёсламоқда. Ўшанда ёнғин 87 кишининг умрига зомин бўлганди.
Аввалроқ Бангладешдаги паромда содир бўлган ёнғин оқибатида камида 30 киши ҳалок бўлгани, Нигериядаги мактабда содир бўлган ёнғинда 25 бола ҳалок бўлгани тўғрисида хабар берилганди.
Изоҳ (0)